Hedhja e gazit lotsjelles ne Kuvend Hedhja e gazit lotsjelles ne Kuvend
Kuvendi i Kosovës ka vendosur të blejë skanera specialë për kontrollimin e çdo personi që hyn në mjediset e legjislativit kosovar.
Të sfiduar prej muajsh nga futja “misterioze” e gazit lotsjellës në seancat e Kuvendit, nga deputetët opozitarë, zyrtarët e Kuvendit presin që skanerët e rinj të kontrollojnë me imtësi, nëse kapsollat gjenden në trupin e një personi.
Për blerjen e skanerit special, Kuvendi ka kërkuar nga Qeveria një buxhet prej 270 mijë eurosh, i cili është miratuar nga kabineti qeveritar.
“Kuvendi i Kosovës ka saktësuar se, ka nevojë për skanerin e tipit ‘teknologjia valore milimetrike’, që përmbush kërkesat e këtij institucioni”, tha Kujtim Shala, zv.kryeministër i Kosovës.
Zyrtarë të Kuvendit nuk kanë pranuar të flasin për specifikat e skanerit dhe kohën se, kur pritet ta instalojnë, por eksperti i Kriminalistikës Milazim Gashi beson se, me këtë pajisje, gazi lotsjellës nuk do të mund të kalojë më pa u zbuluar.
“Ka skanera që e kapin gazin në mënyrë milimetrike, në mënyrë që e zgjidh njëherë e përgjithmonë problemin e gazit, apo të ndonjë natyre tjetër. Besoj që është një veprim i vonuar, por është hapi i duhur, që Kuvendi i Kosovës ta mbyllë njëherë e përgjithmonë këtë çështje në konceptin profesional, në konceptin e sigurisë, që deputetët të mos kalojnë në formën më të vrazhdë, siç kanë kaluar më herët”, tha Milazim Gashi, ekspert i Kriminalistikës.
Deri tani, për futjen e gazit lotsjellës janë hedhur shumë hipoteza, asnjë e vërtetuar gjithsesi, por në mbledhjet e Kryesisë së Kuvendit janë hedhur edhe dyshime për bashkëpunim të opozitës me sigurimin e Kuvendit, sikurse edhe te cilësia e dobët e pajisjeve të kontrollit në hyrje./ Top Channel
