Forcat ushtarake irakiane kanë marrë qytetin e Tikritit, bastionin i xhihadistëve të ISIS-it prej disa muajsh.
Pas shumë betejash të përgjakshme e sulmesh ajrore të udhëhequra nga ndërkombëtarët, lufta për të rimarrë vendin ku dikur ishte fshehur Sadam Hyseini ka përfunduar.
Sipas medieve ndërkombëtare, qindra ekstremistë besohen të jenë të fshehur në një kompleks pallatesh në veri të qytetit, në pritje për të ndryshuar fatin e Tikritit, transmeton “Shekulli”.
“Forcat tona të sigurisë kanë arritur në qendër të Tikritit, duke e çliruar thuajse nga të gjitha anët. Tashmë kemi një kontroll të plotë të të gjithë qytetit, duke përfshirë këtu edhe ambientet qeveritare, selinë e guvernatorit, si edhe spitalin kryesor”, tha kryeministri Haider al-Abadi.
Qyteti i çliruar nga terroristët është shkatërruar thuajse plotësisht dhe gati gjysma e popullsisë kanë braktisur banesat e tyre.
Por forcat irakiane të sigurisë i druhen faktit se në trupat e viktimave, xhihadistët mund të kenë vendosur eksplozivë.
Sipas disa zyrtarëve të sigurisë irakianë se militantët kanë vendosur dhjetëra bomba edhe në rrjetin e tuneleve nëntokësore, si dhe nëpër bunkerë.
Tikriti është një pikë kyçe në Lindjen e Mesme, zonë kjo e mikluar shumë edhe nga xihadistët, pasi shërben si urë lidhëse me Bagdadin.
Përkrah forcave irakiane në këtë betejë ka qenë ushtria amerikane me avionët e saj nga ajri, duke bombarduar pikat kryesore të militantëve.
