Kryeministri i Republikës së Kosovës, Isa Mustafa, ka thënë se dënimi për krime kundër njerëzimit dhe për gjenocid i kriminelit serb të Bosnjës, Radovan Karaxhiq, është fitore e drejtësisë mbi krimet e llahtarshme, të organizuara dhe të kryera nga Serbia kundër popujve të Ish-Jugosllavisë gjatë viteve të ’90-ta.
“Dënimi me 40 vjet burg nga Tribunali i Hagës, megjithëse i pamjaftueshëm, është tregues se të gjithë organizatorët dhe kryesit e krimeve makabre të organizuara nga regjimi i atëhershëm serb, do të ballafaqohen me drejtësinë. Karaxhiq dhe bashkëpunëtorët e tij në Beograd e kudo gjetkë, nuk mund t’i shpëtojnë gjykimit të botës demokratike për vuajtjet dhe krimet e panumërta që i shkaktuan në këtë rajon. Presim dënimin e të gjithë drejtuesve të makinerisë kriminale të regjimit të Millosheviqit, përfshirë ata që vranë mijëra njerëz në Kosovë, shumë prej të cilëve janë ende të pagjetur”, shkruan Mustafa, në Facebook.
