Ish ministri i jashtëm i Kosovës, Enver Hoxhaj ka reaguar pas kundërshtimeve të opozitës për demarkimin e kufirit me Malin e Zi duke thënë se nuk ka hapësirë për frikë dhe keqkuptime.
Si kryetar i Komisionit Parlametnar për punë jashtme, ai konfirmon të ketë pranuar një raport nga Komisionit Shtetëror për përcaktimin e vijës kufitare ku thotë se “vija kufitare ndërshtetërore do të shënohet në përputhje me Kushtetutën e vitit 1974 dhe Planin e Ahtisaarit”, transmeton Koha.net
“Pas leximit të tërësishëm të raportit, është shumë e qartë se nuk ka hapësirë për frikë dhe keqkuptime. Përcaktimi i vijës kufitare është në përputhje me Kushtetutën e vitit 1974 dhe Planin e Ahtisaarit. Asnjë metër e tokës së Kosovës nuk i falet askujt dhe shënimi i kufirit ndërshtetëror si kufi ndërkombëtar është ngjarje e madhe dhe shumë pozitive për sovranitetin e vendit” ka shkruar Hoxhaj në Facebook.
Ai fton qytetarët, partitë politike, deputetët apo edhe pjesëtarët e shoqërisë civile që ta shohin raportin dhe kuptojnë të vërtetën.
Koha Ditore në numrin e sotëm shkruan se vetëm dy faqe është përmbajtja e gjithë raportit qeveritar që arsyeton vijën kufitare me Malin e Zi, e cila, sipas opozitës dhe banorëve lokalë, ia tkurrë territorin Kosovës për 12 mijë hektarë.
Gazeta ka siguruar raportin e hartuar nga Komisioni për shënjimin dhe mirëmbajtjen e kufirit shtetëror. Kabineti Qeveritar e ka miratuar atë dhjetë ditë më parë.
Firmosja e marrëveshjes për kufirin pritet të bëhet këtë javë në Vjenë. Opozita për nesër ka paralajmëruar një protestë në Pejë, për të kundërshtuar këtë vendim.
