2015’ta është viti i fundit që diaspora Kosovare do të paguaj miliona euro taksë për të hyrë në Kosovë në emër të sigurimeve kufitare. Pas vendimit për përgjysmim të tarifave të polisave kufitare të sigurimit nga Banka Qendrore e Kosovës, pritet që shumë shpejtë të merret vendimi për heqjen komplet të pagesave për polisa në kufi.
Këtë e ka konfirmuar për Gazetën Fjala, udhëheqësi i delegacionit kosovarë për sigurimet Kosovë-Serbi, Rrahim Pacolli, i cili është shprehur i bindur se edhe në Kosovë do të filloj të zbatohet Kartoni i Gjelbër.
“Nesër kemi takim me palën serbe dhe jam i bindur që do të arrijmë marrëveshje që Byroja Evropiane të na jap të drejtën për t’a implementuar Kartonin e Gjelbër, qoftë përmes një shteti tjetër qoftë vetë Kosova”, ka thënë Pacolli.
Sipas tij, ekziston gatishmëri edhe te pala serbe për një vendim të tillë.
Por, ky vendim ka gjasë të hasë në rezistencë të fortë tek kompanitë e sigurimeve në Kosovë, nisur nga përvoja e mëhershme me këto polisa.
Pacolli tregon për Gazeten Fjala se edhe për vendimin e fundit për uljen e taksës ka pasur kundërshtim të madh tek kompanitë tjera të sigurimeve, të cilat nuk mund të heqin dorë nga miliona euro përfitime.
Në anën tjeter Banka Qendrore e Republikës së Kosovës, më datë 18 qershor 2015, mori vendimin për uljen e tarifave të sigurimit kufitar të autopërgjegjësisë nga 1 korriku i këtij viti.
Ulja e tarifave të sigurimit kufitar të autopërgjegjësisë do të aplikohet për të gjitha kategoritë e mjeteve motorike.
Tarifat për kategorinë e “auto veturave”, që kryesisht kanë ndikim te bashkatdhetarët që jetojnë në diasporë, do të jenë:
-
Zbritje prej 50% për policat e sigurimit kufitar me kohëzgjatje prej 15 ditëve, e cila tani do të kushtojë 15 euro.
-
Zbritje prej 51% për policat e sigurimit kufitar me kohëzgjatje prej 1 muaj, e cila tani do të kushtojë 20 euro.
-
Zbritje prej 49% për policat e sigurimit kufitar me kohëzgjatje prej 2 muaj, e cila tani do të kushtojë 35 euro.
Këtë vendim kryetari i Kuvendit të Kosovës, Kadri Veseli e pati vlerësuar si hap të mirë, por që sipas tij nuk është i mjaftueshëm.
Veseli ka thënë se diaspora nuk duhet të paguaj fare këtë taksë. E që më këtë rast ai edhe ka premtuar se Kuvendi i Republikës së Kosovës, do të krijoj bazë ligjore për lehtësimet në çdo fushë që prek interesin e diasporës.
“Konsiderojmë se edhe pagesa e mbetur 50%, është jodinjitoze kundrejt diasporës dhe vlerësojmë se nuk duhet të paguhet fare. Së shpejti, Kuvendi i Republikës së Kosovës, do të krijoj bazë ligjore për lehtësimet në çdo fushë që prek interesin e diasporës tonë”, ka thënë kreu i Kuvendit të Kosovës.
Polisën e sigurimit të automjeteve e ka kundërshtuar me peticion edhe Kuvendi i Shqiptarëve të Zvicrës.
Avni Binaku, nënkryetar/zëdhënës i Kuvendit të Shqiptarëve të Zvicrës, ka thënë se mjaftë më kanë paguar mërgimtarët, “mjaftë më është detyruar diaspora në mënyrë të padrejtë dhe diskriminuese të paguajë ketë polisë të sigurimeve të automjeteve”.
“Mjaft më kompanive të sigurimeve dhe Byrosë së Sigurimeve për shfrytëzimin e diasporës, pa asnjë kompensim! Mjaft më Qeverisë, Parlamentit, Komisionit për Buxhet dhe Bankës Qendrore të Kosovës, që nga kjo pagesë e padrejtë luajnë me ndjenjat e mërgimtarëve. Mjaft më shfrytëzimit të diasporës. Mjaft më që diaspora të ndjejë vetën në Kosovë, si në vend të huaj”, është shprehur Binaku. /GazetaFjala/
