Kryetari i Gjilanit, Lutfi Haziri ka reaguar përmes proflit të tij në Facebook kundër aksionit të sotëm të Vetëvendosjes duke u shprehur se krejt kjo është një tentativë për të rrënuar shtetin.
Madje ai ka krahasuar këtë aksion me rrënimin e shtëpisë së tij në Gjilan nga ana e Vetëvendosjes gjatë negociatave të Vjenës, transmeton Klan Kosova.
“Në emër të Zotit dhe Atdheut, nuk ka kompromis për ndarjen e brendshme të Kosovës, as krijim të territoreve të brendshme për ndarje, e as kompetenca ekzekutive për Asociacionin” ka thënë Haziri.
Më poshtë është shkrimi i plotë i Lutfi Hazirit në rrjetin social Facebook:
Aksioni i sotëm i Vetëvendosjes për rrënimin e shtëpisë së kryeministrit Mustafa në Prapashticë është tentim për rrënim të shtetit, i cili nuk do të ndodhë. Ky aksion ma kujton tentimin për rrënimin e shtëpisë sime në Gjilan nga ana e tyre gjatë negociatave të Vjenës, ma kujton ’listën e zezë’ të tyre në bisedimet e asaj kohe përfshirë edhe emrin tim dhe atë të Fatmir Sejdiut, Hashim Thaçit e Veton Surroit, derisa këtë të fundit sot e kanë ba babë! Në emër të Zotit dhe Atdheut, nuk ka komromis për ndarjen e brendshme të Kosovës, as krijim të territoreve të brendshme për ndarje, e as kompetenca ekzekutive për Asociacionin. I uroj shumë të mira e shëndet delegacionit të Kosovës. E di që janë bisedime të vështira, por nuk guxojnë të lëshojnë pe. Kosova është unike dhe e pandashme, me të drejt bashkimi me Shqipninë!
Lut Emrush Haziri – nipi i Hetem Hazirit (i dekoruar me ”Shqiponjën e Artë të Lirisë” nga Presidenti i Shqipërisë), në mbrojtje të atdheut në emer të Zotit dhe Shtetit!
