Deputeti i Aleancës për Ardhëmrinë e Kosovës (AAK), Daut Haradinaj, në emisionin “Info – Box” të TV Dukagjini, ka theksuar se ai do ta përkrah vendimin e liderëve të opozitës nëse ata, sipas tij, vendosin që të hyjnë në një listë të përbashkët zgjedhore.
Haradinaj ka thënë se është i sigurt se opozita do të hyjë në një listë të përbashkët zgjedhore.
Ai është shprehur se nëse do të kishin një listë të përbashkët zgjedhore, partitë që janë në pushtet nuk do ta kishin shumicën në Qeveri.
“Liderët opozitar janë bashkuar dhe po dëshmojnë që opozita është e bashkuar dhe unike. Kështu do të vazhdojnë edhe të ardhmen. Një listë e përbashkët do t’iu pamundësonte dy partive në pushtet ta kenë shumicën”, ka shtuar ai.
Haradinaj ka sqaruar se më nuk do të jetë në listën e kandidatëve për deputet dhe se është i kënaqur me angazhimin e tij si kryetar i degës së AAK-së në komunën e Deçanit.
