Nënkryetari i Kuvendit të Kosovës, Xhavit Haliti ka thënë se institucionet vendore nuk kanë pse të bisedojnë me Holandën, sa i përket vendosjes së Gjykatës Speciale në këtë shtet, pasi që është Brukseli ai që duhet të flasë me Holandën.
Haliti ka theksuar se pas ndryshimeve kushtetuese lidhur me këtë gjykatë, ai që duhet të merret vesh me Holandën është Brukseli e jo parlamenti i Kosovës.
“Pas miratimit të ndryshimeve kushtetuese në Kosovë dhe atij statusi që duhet ta ketë Gjykata, Brukseli merret vesh me Holandën, jo Parlamenti i Kosovës, unë kështu besoj që duhet të jetë. Unë nuk kam dëgjuar që ka ndonjë bisedë në mes Kosovës dhe Holandës sa i përket asaj çështje. Prokurorë nga Evropa, qoftë të EULEX-it, qoftë prokurorisë Speciale, kanë qenë prezent gjithë kohën këtu, kështu që punët e tyre ne nuk i dimë”, ka thënë Haliti pas mbledhjes së Kryesisë së Kuvendit.
