Komisioneri i BE-së për Fqinjësi dhe Zgjerim, Johannes Hahn ka thënë se ka ardhur në Kosovë për të uruar dhe festuar anëtarësimin e Kosovës në UEFA, dhe hyrjen në fuqi të MSA-së.
Ai ka thënë se perspektiva ekonomike është shumë e rëndësishme, dhe është një nga elementet kryesore të vendit.
“MSA-ja shtynë vendin drejt, do të përbëhet një grup i përbashkët që të krijojnë një udhërrëfyes që merret me nevojat e domosdoshme dhe nevojshme për sundimin e Ligjit në Kosovë. Sundimi i Ligjit është i rëndësishëm për shumëçka por edhe për investitorët”, ka thënë Hahn.
“Në vitet e ardhshme do të jenë mbi 300 milionë euro në dispozicion për të akomoduar bizneset në sfidat që dalin nga MSA-ja, në mënyrë që ata të jenë të konkurrueshëm në tregun evropian. Nëse ke qasje në tregun evropian, ke edhe në atë global sepse standardet janë thuajse të ngjashme”, ka thënë ai.
Ai ka shprehur besimin se liberalizimi i vizave për Kosovë do të bëhet shpejtë, ndërsa ka rekomanduar subjekteve, shoqërisë civile dhe të gjithë të tjerëve të jenë të bashkuar për të mirën e Kosovës.
