Është dita e 24-të e protestës në Tiranë.
Dhjetëra mijëra qytetarë, po vazhdojnë protestën kundër investimeve të huaja në zonën e mbrojtur në Zvërnec të Vlorës.
E në këtë protestë, po vazhdon të shihet edhe flamuri i Ushtrisë Çlirimtare të Kosovës.
Kjo ka shtyrë që të reagojë edhe Organizata e Veteranëve të Luftës në Prishtinë.
Kryetari i saj, Hysni Gucati, thotë se flamuri i UCK-së, nuk duhet të përdoret për arsye politike.
“Ky është flamur i UÇK-së e ka vendin nëpër arkiva, institucione, memorial, në organizata të veteranëve apo shoqata të dala nga lufta e jo në protesta. Ky flamur mund të përdorët në protesta vetëm kur veteranët protestojnë për ligjin e vlerave të luftës dhe protestojnë për vete atëherë duhet me marshu ne me këtë flamur”, ka thënë Gucati, raporton Teve1
Për këtë çështje, Gucati ka fajësuar edhe organizatorët e protestës.
“Dritan Goxhaj duhet me na kërkuar falje ne, me thanë kam gabuar që kam fol në emër të luftëtarëve dhe nuk është anëtar i organizatës së veteranëve të luftës. Nëse me gjenë ai mua një dokumente që ka qenë anëtar i organizatës së veteranë të luftës unë nuk jam më. Dritan Goxhaj nuk është, mos të keqpërdorët flamuri i UÇK-së, nuk e kemi atë drejtë me përdorë flamurin e UÇK-së në këto protesta që nuk ia dimë as kryet, as kush është organizatori nuk e dimë as çka kërkojnë. Vetëm dy fjalë i kemi dëgjuar aty “burg Rama”, “burg Berisha”’, u shpreh ai.
E së fundmi, vet kryeministri shqiptar, publikoi një letër.
Në të thuhej se Goxhaj refuzoi t’i bashkohej UCK-së.
Madje letra mban firmën e Xheladin Gashit, të njohur si Komandant Plaku.
“Letra është e nënshkruar prej komandant Xheladin Gashi – Plaku në Shqipëri, në tokën shqiptare. Ata njerëz të cilët kanë dyshime apo hamendje, mos të dyshojnë ajo letër që e ka qit Edi Rama, apo kush do që e ka qit dhe është bërë publike, është letër prej komandant Plaku. Dritan Goxhaj, ka qenë diku dy muaj në vitin 1999, në prill dhe maj edhe atë ka qenë i paguar ka 800 marka i ka marrë në atë kohë prej shtabit të përgjithshëm të Ushtrisë Çlirimtare të Kosovës”, shprehet kreu i OVL-UÇK-së.
