Deputeti i Lidhjes Demokratike të Kosovës, Blerim Grainca nuk e sheh kryetarin e Partisë Demokratike të Kosovës, Hashim Thaçin, kandidat të denjë për ta udhëhequr shtetin.
“Hashim Thaçi nuk është kandidat serioz për president”, ka thënë ai për Tribuna Channel.
Edhe bashkëluftëtari i Thaçit, që tash është deputet i Nismës për Kosovë, Haxhi Shala, ka thënë se në të kaluarën ka qenë në mbështetje të kryetarit të PDK-së, por tash nuk e sheh atë si person unifikues.
Megjithatë, ky i fundit ka thënë se në parti ende nuk është vendosur se si do të sillen ditën kur do të zgjidhet presidenti.
Grainca konsideron se kryeministri, Isa Mustafa nuk ka bërë asnjë shkelje me rastin e nënshkrimit të Marrëveshjes për Asociacionin e Komunave me Shumicë Serbe. Në emisionin Politikë me Sejdi Demirin në Tribuna Channel, ai ka shprehur edhe qëndrimin e artikuluar të Grupit parlamentar të LDK-së, se Kushtetuta nuk është shkelur.
Megjithatë, ai ka thënë se vlerësimet mbi aktgjykimin e Kushtetueses e japin ekspertet juridik.
Grainca ka përkujtuar se PDK e LDK e përbëjnë qeverinë e shumicës. Sipas tij, vetëm me dialog mund të arrihet edhe atje ku synon opozita, por jo edhe me dhunë.
“Unë nuk mendoj se zgjedhjet janë opsion sepse edhe ashtu nuk do të ndryshoj asgjë në renditje. Prandaj duhet dialog mes palëve, Por për t’u arritur kjo duhet të ekzistoj gatishmëri e të dy palëve, pa kushte”, ka deklaruar Grainca.
