Shefi i Grupit Parlamentar të PDK-së, Adem Grabovci, thotë se takimi mes dy qeverive, asaj të Shqipërisë dhe të Kosovës, është takim i cili do sjellë realizimin e shumë planeve të përbashkëta.
“Këtë takim e vlerësojmë shumë pozitivisht, tu e pas parasysh që është vazhdimësi e takimeve të kaluara mes dy qeverive. Tash qeveritë do të realizojnë edhe shumë qëndrime, si në fushën e ekonomisë, shëndetësisë, arsimit, duke përfshirë edhe shumë fusha të tjera”, ka thënë Grabovci për Indeksonline.
Sipas tij, ky takim, i cili do të mbahet në Tiranë, do të jetë i mirëseardhur për Kosovën.
“Takimi do të jetë i mirëseardhur për Kosovën, dhe mbi të gjitha për biznesin kosovar. Shembull, në të dy anët e kufijëve do të bëhet shkëmbimi i mallrave, andaj ky takim do të jetë shumë pozitiv”, ka shtuar ai./Indeksonline/
