Pas lajmit në mediat serbe se Marko Gjuriq, drejtori i zyrës për Kosovën në Qeverinë e Serbisë do të vijë në Mitrovicë që të protestojë për shtyrjen e afatit të paraburgimit për Oliver Ivanoviq, Ministria e Punëve të Brendshme e Kosovës ka deklaruar për Klan Kosova, se Gjuriq nuk ka leje që të hyjë në shtetin kosovar.
Zyra e Informimit ka thënë se:
“Vizita e drejtorit të zyrës për Kosovën në Qeverinë e Serbisë nuk do të realizohet, për shkak se Marko Gjuriq nuk ka leje për të hyrë në Kosovë”.
Sot përmes një deklarate, Marko Gjuriq kishte thënë se do t’i bashkohet protestës së Iniciativës Qytetare SDP në përkrahje të Oliver Ivanoviq-it dhe ish kolonelit Dragoljub Delibasiq, raportoi Tanjug.
Kjo është protesta e dytë e organizuar nga serbët e Kosovës, e cila do të mbahet para selisë së gjykatës së EULEX-it në Mitrovicë.
Ivanoviq është në ditën e shtatë të grevës në burgun e Mitrovicës. Këtë po e bën pasi që atij i është shtyrë dita e gjykimit, dhe po kërkon të mbrohet në liri.
Ai ishte arrestuar me 27 janar në vitin 2014 për krime ndaj shqiptarëve.
