Po vazhdon kthimi i migrantëve nga vendet e Bashkimit Evropian. Afër 60 persona kanë arritur sot në Aeroportin Ndërkombëtar të Prishtinës – “Adem Jashari”, përmes një fluturimi të veçantë nga Gjermania.
Nga ta kanë qenë katër familje, ndërsa të tjerët kanë qenë kryesisht individë. Ndërsa, janë larguar nga Kosova kohëve të fundit në kërkim të një jete më të mirë.
Njëra nga ta është edhe Xilaje Isaku nga Suhareka, e cila së bashku me burrin dhe katër fëmijët e saj nga tetori kanë migruar në mënyrë ilegale për në Gjermani. Ajo ka treguar se përmes Hungarisë kanë depërtuar në Gjermani, por rruga deri atje ka qenë mjaftë e vështirë. Ajo thotë se nuk ka dëshirë të kthehet më atje.
“Kemi shkuar deri atje në Hungari me autobus, pastaj, prej Hungarisë e kemi gjetur një lidhje për në Gjermani. Kemi kërkuar azil dhe kemi ndenjur. Jo, nuk kam dëshirë më të shkoj. Shkuam se kishe më mirë atje jeta, për fëmijët e për neve, se këtu pa punë e pa asgjë. Mu më erdhi letra për tu kthyer dhe u ktheva vullnetarisht”, tha Isaku.
Edhe Gafurr Kabashi nga komuna e Prizrenit, kishte migruar së bashku me familje në Gjermani rreth një viti më parë, për të kërkuar një jetë më të mirë. Ai thotë se po t’i jepet mundësia do të migrojë përsëri.
“Po kthena prapë. Qe një vjet e një muaj jam në Gjermani. Na kanë pritë mirë, kështu kushtet e mira kanë qenë, por ka ardhur momenti dhe na kanë kthyer… Këtu nuk ka të ardhme dhe papunësia e është arsyeja”, tha Kabashi.
