Bordi i Drejtorëve në komunën e Gjakovës, ka mbajtur mbledhjen e rregullt, të udhëhequr nga kryetarja Mimoza Kusari-Lila, në të cilën është krijuar Komisioni për përdorimin e katalogut të vendeve të punës në shërbimin civil dhe metodologjinë për standardizimin e vendeve të punës në administratën komunale, që është kërkuar nga Armend Vokshi, drejtor i Drejtorisë së Administratës.
Ky komision do të udhëhiqet nga kryetarja Kusari-Lila dhe do të ketë edhe përfaqësues nga Drejtoria e Administratës, Drejtoria e Arsimit, Drejtoria e Shëndetësisë, Drejtoria për Buxhet dhe Financa dhe Drejtoria për Zhvillim Ekonomik.
Drejtori i Administratës, Armend Vokshi, ka dhënë informacionet rreth shpërnguljes së shtëpive nga komuniteti rom-ashkali dhe egjiptian (RAE) në lagjen “Ali Ibra”, duke kërkuar të bëhet verifikimi i shtëpive të braktisura dhe në sajë të afatit ligjor kohor, shtëpitë që nuk shfrytëzohen brenda 6 muajve, atëherë të njëjtat do të merren në shfrytëzim nga komuna dhe do t’iu jepen në shfrytëzim të pastrehëve.
Këto shtëpi janë ndërtuar nga Caritasi Zviceran dhe tokën e kishte ofruar Komuna e Gjakovës, raporton KosovaPress.
Edhe kërkesa e drejtorit të Drejtorisë për Buxhet dhe Financa, Teki Shala, ka arritur në përfundim pozitiv për bartjen e mjeteve të pashpenzuara nga të hyrat vetanake të vitit 2014 në buxhetin e vitit 2015.
Xhelal Hoxha, drejtor i Drejtorisë së Urbanizmit dhe Mbrojtjes së Mjedisit ka raportuar mbi implementimin e ligjit për sistemimin e adresave si dhe ka kërkuar përcaktimin e mënyrës së buxhetimit të vendosjes së tabelave me emërtim dhe numra të njësive.
Me propozim të kryetares Kusari – Lila, është arritur në përfundim që deri nga mesi i javës tjetër të jetë i gatshëm një projekt dhe në gjuhën angleze, dhe i njëjti t’iu dërgohet donatorëve për mbështetje financiare, pasi implementimi i këtij ligji është i ndërlidhur në mënyrë direkte edhe me procesin e integrimit evropian dhe liberalizimin e vizave.
