Këshilltari i Kryeministrit Isa Mustafa dhe zëvendësministri i Administrimit të Pushtetit Lokal, Bajram Gecaj, ka shkruar se Lëvizja Vetëvendosje është e gatshme të bëjë gjithçka vetëm për pushtet.
“Pra, këta anarkistë kokëfortë, deri më tani kanë provuar se mund të bëjnë shumë të pabëra, pa as më të voglin hezitim se po i shkelin të gjitha vijat e kuqe të kornizës demokratike, vetëm e vetëm për të arritur në pushtete”, ka shkruar Gecaj në llogarinë e tij në Facebook, njofton Klan Kosova.
Ky është shkrimi i plotë i Gecajt në Facebook:
E dëshpëruar pandalshëm se nuk po mund ta marr pushtetin, përkundër metodave dhe mjeteve plotësisht të papranueshme, Lëvizja Anarkiste e Vetëvendosjes (LAV) fillimisht ju drejtua dy partive opozitare për ndihmë. Përgjigja e partive opozitare ishte pozitive, edhe pse bashkimi dhe veprimi në një tërësi kërkonte nga ato të “dilnin nga lëkura” e tyre, e që nënkuptonte përqafimin e mjeteve dhe metodave të dhunshme të cilat në parim ishin të huaja deri atëherë për natyrën dhe punën e këtyre dy subjekte.
Të ngazëllyer, por pa mbulesë, se si subjekt politik po e bëjnë punën mirë, kërkuan ndihmë nga qytetarët e Kosovës, që ata me protesta ta përkrahin aktivitetin dhe qasjen e tyre, por numrat asnjëherë nuk ishin të mjaftueshëm që të shkaktonin ndonjë “tërmet” të vërtete politik.
Të zhgënjyer se nuk po ju ecën puna si duhet, duke e arsyetuar vetveten se nuk po kuptohen drejtë, por pa urtinë për të reflektuar se mos ndoshta po veprojnë shtrembët, ata madje ju drejtuan edhe deputetëve të koalicionit qeverisës, posaçërisht atyre të LDK-së, me shpresën se do të gjejnë bashkëpunëtor për kauzën e tyre, për ta pësuar gjithashtu zhgënjimin e radhës.
Për më keq, prej sëkëlldisë se po dobësohen nga përçarja, para disa ditësh ishim dëshmitar të një fenomeni bezdisesh e shumë të mbrapsht, kur lidershipi i LAV kërkoi ndihmë edhe aty ku nuk e lejon e moralshmja në politikë e as politika si etikë – kërkuan ndihmë nga fëmijët e shkollave të mesme.
Po në këtë vazhdë, dhe krejt në fund, ftojnë që qëllimeve të tyre finale tu bashkohet edhe “shoqëria civile“, sado që atë shpesh e pajustifikueshëm, dhe më shpesh edhe kutrum, e kanë shpallur destruktive, të rrezikshme dhe të dëmshme për Kosovën.
Pra, këta anarkistë kokëfortë, deri më tani kanë provuar se mund të bëjnë shumë të pabëra, pa as më të voglin hezitim se po i shkelin të gjitha vijat e kuqe të kornizës demokratike, vetëm e vetëm për të arritur në pushtete.
Do të ishte mirë sikur t’i vendosin gishtin kokës e më në fund t’i kthehen metodave të dëshmuara normale opozitare, pra metodave të cilat përdoren nga opozita e vendeve të familjes demokratike. Që si të tillë ta luajnë rolin e tyre shumë të rëndësishëm opozitar, dhe në këtë mënyrë edhe t’i mundësojnë Qeverisë së Kosovës ta korrigjojë veten aty ku ka hapësirë përmirësimi. Të shpresojmë se indikacionet e këtyre ditëve do të jenë thirrje për reflektim, e për rrjedhojë do të rezultojnë në kthimin e opozitës në Kuvend dhe në aktivitetet normale për të mirë të të gjithë qytetarëve të Republikës se Kosovës.
