Nuk ka rivalë për Lewis Hamilton as në Hungari ku kampioni i botës regjistroi kohën më të shpejtë në provat zyrtare të zhvilluara në pistën e Hungaroring. Britaniku zbriti i karikuar në pistë për raundin e dhjetë sezonal duke dominuar në të tre sesionet e provave ku la pas shokun e skuadrës Nico Rosberg dhe ish 4 herë kampionin e botës, Sebastian Vettel.
Mercedesi i Hamilton fluturoi mbi asfaltin hungarez për t’i dhënë një avantazh të madh në radhën e nisjes britanikut i cili mban vendin e parë në klasifikimin e përgjithshëm me 17 pikë më shumë se gjermani.
Me kohën 1 minutë, 22 sekonda e 20 të qindtat, Hamilton interpretoi në perfeksion xhiron në sekondat e fundit të sesionit të tretë edhe pse Rosberg e kishte mbyllur provën e tij duke ia dorëzuar vendin e parë shokut të skuadrës. Vetëm koha e tretë më e mirë për Ferrarin e Vettel që hasi vështirësi në garimin e tij duke i mbyllur provat me 7 të dhjetat më shumë, i ndjekur nga Daniel Ricciardo, i cili ngiu në fund Kimi Raikkonen.
Zhgënjimi shkoi për skuadrën Williams me dyshen Bottas-Massa respektivisht në vendin e gjashtë dhe të shtatë, ndërsa Fernando Alonso do të niset nga radha e tetë me kohën e 15 më të mirë./ss/
