Dhuna në Parlamentin e Kosovës dhe dhuna e shkaktuar nga protestat e Opozitës në Kosovë shumë miq të vendit i ka shndërruar në abstenues dhe shumë të tillë që dikur kishin pozicion dyshues, tashmë janë shndërruar në kundërshtarë.
Kështu ka thënë në emisionin Zona B, deputeti i Lidhjes Demokratike të Kosovës, Arben Gashi, i cili posa është kthyer nga një udhëtim në institucionet kryesore të Bashkimit Europian.
Gashi tha se pamjet dhe dhuna e shfaqur kohëve të fundit ka shqetësuar edhe vendet që kanë qenë mbështetësit kryesore të Pavarësisë së Kosovës.
“Kemi pasur vizita në Parlamentin, Komisionin dhe Këshillin Europian dhe në këto takime ka pasur disa tema kryesore që janë diskuar. Ata na kanë thënë se Kosova nuk mund të lejojë këtë situatë, dhe se pamjet e kohëve të fundit janë diskurajuese”, ka thënë Gashi.
“Këto i kanë thënë në takimet që kemi pasur me anëtarët e Parlamentit Europian që vinë nga Partitë Popullore. Ata janë shumë të shqetësuar”.
“Edhe me takimet e tjera si me komisionerin Johanes Hahn ishte temë kryesore dhuna në Kosovë, e cila ka shkaktuar pasoja”
“Përkrahësit e Kosovës janë shndërruar në abstenues kurse abstenuesit në kundërshtarë”.
“Koktejtë e molotovit dhe hedhja e veve janë përmendur, po ashtu në mënyrë specifike”.
“Ka shqetësim edhe nga vendet përkrahëse, siç janë Gjermania për shembull , po ashtu edhe në Francë edhe në Austri dhe në Holandë”, ka thënë Gashi në Zona B.
Ai ka shtuar se “vendet më problematike në përkrahje të Kosovës janë vendet që nuk e kanë njohur Kosovën. Ose nuk marrin pjesë fare në votime ose abstenojnë. Mirëpo tani po marrin pjesë në një numër të madh, dhe po votojnë kundër”.
“Shqetësimi që kemi është lidhur me zgjedhjen e presidentit dhe proceset që po ndodhin në Kosovë dhe të njëjtin shqetësim ndajnë edhe krerët e BE-së. Është thënë haptazi se Kosova nuk duhet t’i lejojë vetes dhunë”.
