Një letër e hapur e nënshkruar nga 50 ekspertë të sigurisë kombëtare nga Partia Republikane kanë paralajmëruar se kandidati për president të Shteteve të Bashkuara të Amerikës, Donald Trump, “do të ishte presidenti më i pamatur” në historinë e vendit.
Grupi i ekspertëve, që përfshin ish-drejtorin e CIA’s, Michael Hayden, kanë thënë se Trumpit “i mungojnë karakteri, vlerat dhe përvojat” që nevojiten për të qenë president, transmeton Gazeta Express.
Shumë prej nënshkruesve të letrës nuk kishin pranuar të nënshkruanin një letër të ngjashme në muajin mars.
“Asnjëri prej nesh nuk do të votojë për Donald Trumpin”, thuhet në letrën e ekspertëve, raporton BBC.
“Ai dobëson autoritetin moral të SHBA’së si udhëheqëse e botës së lirë”, thekson letra.
“Atij duket se i mungojnë njohuritë themelore për Kushtetuën, ligjet dhe institucionet e SHBA’së, dhe besimi në to…”, thuhet në letrën e ekspertëve republikanë.
Letra vjen pasi një numër i madh i figurave të mëdha republikane kanë dalë haptas kundër Trumpit.
Miliarderi nga Nju-Jorku në zgjedhjet presidenciale të nëntorit në SHBA përballet me kandidaten e Partisë Demokratike, Hillary Clinton. /Express/
