Masat e ashpra mbas tentativës së grushtit të shtetit në Turqi, janë shendrrue në gjueti shtrigash. Ato që po i bahen lëvizjes Gulen, janë shumë herë ma të mëdha se spastrimet e komunistëve të dyshuem në vitet 1950 në Amerikë, shkruen revista The Economist në nji editorial.
Revista e përjavshme “The Economist”, në numrin e saj të fundit në versionin e shkruem ka botue nji shkrim të gjatë me titull “Spastrimet e gulenistëve në Turqi” dhe thekson se masat e ashpra mbas tentativës së grushtit të shtetit në Turqi nuk janë asgja tjetër, veçse nji gjueti shtrigash. Revista nënvizon faktin se, “masat e ndërmarra, gjithnji e ma shumë i ngjanë nji gjuetie shtrigash, jashtëzakonisht shumë herë ma të mëdha se spastrimet e komunistëve të dyshuem në Amerikë në vitet 1950 nga senatori Joe Mçarthy”.
Shkrimi i revistës prestigjioze “The Economist” fillon me historinë e pushimit nga puna të nji akademike të universitetit “Gediz”, Ishtar Gëzajdën dhe ban nji pasqyrim të plotë të pasojave sociale të këtyne spastrimeve. Simbas revistës, masat kanë prekë direkt ma shumë se 100 mijë njerëz në të gjithë vendin, ndërkohë që spastrimet përfshijnë ushtarakë, akademikë, nëpunës civilë, gazetarë, biznismenë, pilotë dhe njerëz të profesioneve të ndryshme.
Qeveria po ia faturon gabimet e saj ‘lëvizjes Gulen’
Në shkrimin e saj, revista “The Economist” nënvizon faktin se, mbas tentativës së dështueme të grushtit të shtetit të 15 Korrikut, qeveria po ia faturon tana gabimet dhe dështimet lëvizjes Gyuen dhe me këtë veprim ajo po përpiqet që të rishkruej historinë nga e para.
“Qeveria ban përgjegjëse Lëvizjen Gulen për dështimin e planit të paqes më Partinë Popullore të Kurdistanit (PKK) si dhe për vonesat në nisjen e luftës kundër ISIS. Mbas kopetencave të pakufishme mbas shpalljes së gjendjes së jashtëzakonshme, nuk egziston pothuejse asgja dhe asnji mundësi që të kontrollojë shtypjet e presidentit Erdogan”.
Paranoja asht shtri përtej kufijve të Turqisë
“Paranoja tashma asht shtri dhe përtej kufijve të Turqisë. Në Holandë, shkollat që kanë lidhje me lëvizjen Gulen kanë punësue roje të sigurisë, mbasi prindët janë ankue për kërcënime të vazhdueshme ndaj tyne dhe fëmive të tyne. Në Bullgari, qeveria ka deportue nji person në Turqi, mbas pretendimeve se ai kishte lidhje me lëvizjen Gulen, pamvarësisht kundërshtimit të gjykatave të këtij vendi. Agjencia shtetnore turke e lajmeve, “Anadollu”, ka publikue “listat e zeza” të personave dhe subjekteve që akuzohen si të lidhuna me lëvizjen Gulen për secilin vend. Nji prokuror turk së fundi akuzoi Vatikanin se ka emnue Gulenin si “kardinal sekret” në vitet 1990”.
