Nënkryetari i Lëvizjes Vetëvendosje, Driton Çaushi, në një postim në rrjetin social facebook ka thënë Kushtrim Avdimetaj është i pafajshëm dhe se pushteti ka vendosur ta ndërtoj një përrall të re, sipas të cilës fajtor është aktivisti i ri. Ai gjithashtu rastin e Kushtrim Avdimetaj, që dyshohet se sulmoi institucionet publike, e ndërlidh me rastin Trim Gashit që para disa ditëve u shpall i pafajshëm.
Postimi i plotë i Çaushit:
“Për muaj me radhë, Bajram Gecaj dhe Isa Mustafa e kanë akuzuar aktivistin e Lëvizjes, Trim Gashin, për terrorizëm e për atentat ndaj kryeministrit. Për muaj me radhë disa medie e disa gazetarë i kanë bërë jehonë këtyre akuzave, duke i shpallur ato si të vërteta. Këto akuza kanë ndikuar proceset gjyqësore, dhe si përfundim Trim Gashi është mbajtur në paraburgim për më shumë se pesë muaj.
Por, para disa ditësh Trim Gashi u shpall i pafajshëm. E vetmja “provë” që e “fajësonte” Trimin ishte kartela e anëtarësimit në Vetëvendosje! Të gjitha të tjerat dolën të ishin rrena, të ndërtuara me kujdes të madh, por prapëseprapë rrena të padëshmueshme. Qeveria kishte nevojë urgjente që të gjente një fajtor, dhe synimi ishte që fajtor të bënin Trimin.
Kur dikush akuzon dikë të pafajshëm për terror, atëherë terrorist është vetë akuzuesi. Bajram Gecaj dhe Isa Mustafa, të etur për të shpallur terroristë të pafajshmit, janë terroristët e vërtetë në Kosovë.
Trim Gashi dhe Lëvizja VETËVENDOSJE! është duke përgatitur me kujdes dosjet e padive për të gjithë ata që kanë shpifur, që kanë dhënë “verdikte të formës së prerë”, apo që kanë etiketuar pa të drejtë, në lidhje me rastin e Trim Gashit, gjatë më shumë se pesë muajve që ai është mbajtur në paraburgim.
Ne nuk kërkojmë mbështetje politike prej askujt që nuk është i bindur nga argumentët tanë.
Por kërkojmë mbështetjen e të gjithëve që janë të interesuar në demokraci, në luftën tonë kundër ndëshkimit e përndjekjes të të pafajshmëve, si dhe në luftën kundër shpifjeve të natyrës linçuese.
Sot, pas thirrjeve të Isa Mustafës nga podiumi i Kuvendit, regjimi ka nevojë për fajtorë të rinj. Kështu, kanë vendosur që të ndërtojnë një përrallë të re, sipas së cilës fajtor është Kushtrim Avdimetaj.
Edhe kjo përrallë do të dëshmohet e pavërtetë. Por, i lutem medieve dhe opinionit publik, të mos i bëjë jehonë terrorit qeveritar, që sot më shumë se kurrë ka nevojë ta bëjë të pafajshmin fajtor, në menyrë që fajtori i vërtetë të duket i pafajshëm”.
