Që nga data 16 korrik e vitit 2014, është nënshkruar marrëveshja në mes të Qendrës Kinematografike të Kosovës dhe Radio Televizionit të Kosovës, në lidhje me bashkëpunimin në lëmin e prodhimit të filmit. –
Kjo marrëveshje sipas dokumenteve të nënshkruara është dashur të hyjë në fuqi që nga data 1 janar e vitit 2015 dhe të përfundoj më 31 dhjetor të vitit 2015 (me mundësi të ripërtrirjes), por që kjo gjë nuk ka ndodhur fare dhe kjo marrëveshje ka mbetur vetëm në letër.
Në lidhje me këtë drejtori i Qendrës Kinematografike të Kosovës Arben Zharku, tha se kjo marrëveshje nuk është jetësuar asnjëherë, por sipas tij, institucioni të cilin ai e drejton do të vazhdoj deri në momentin e fundit që të shoh se çfarë do të jetë përgjigjja e RTK-së.
“Afati i Marrëveshjes me sa di unë ka përfunduar. E gjithë kjo marrëveshje është bërë në interes të filmbërësve, pasi që, vet televizioni publik me ligjin e tyre e kanë për obligim që 20% të buxhetit që kanë ta ndajnë për projektet e jashtme për vepra audio-vizuale. Në këtë rast ne kemi bërë një marrëveshje e cila krijon një mundësi që RTK të mbështes me rreth 30% të buxhetit që kanë për veprat audio-vizuale ti mbështesin projektet filmike të QKK-së dhe njëkohësisht ta fitojnë të drejtën edhe të shfaqen në televizionin publik”, theksoi Zharku.
Ai shton se për fat të keq nuk është bërë asgjë ende, dhe se supozon se kjo ka qenë çështje e buxhetit nga ana e RTK-ës, edhe pse ende nuk kanë ndonjë përgjigje konkrete.
Nga ana tjetër drejtori i Radio Televizionit të Kosovës Mentor Shala, tha se kjo marrëveshje patjetër që do të zbatohet, vetëm se ende nuk kanë ndarë buxhet për projektet audio-vizuale.
“Nuk ka filluar ende, sepse nuk kemi ndarë buxhet për projekte audio-vizuale, dhe në marrëveshje shkruan se do të filloj ky projekt atëherë kur ta ndajmë këtë buxhet. Ne tani jemi duke e analizuar situatën dhe të shohim se si do ti kemi mundësitë që ta ndajmë këtë buxhet”, tha Shala duke përfunduar të thotë se kjo marrëveshje do të vazhdoj, vetëm pritet deri në ndarje të buxhetit./Kultplus
