Ende nuk është caktuar grupi i prokurorëve që do të merren me hetimet e skandalit “Panama Papers”, ndonëse Prokuroria bëri me dije se ka nisur verifikimet për kompanitë që dyshohet se kanë pastruar para dhe u janë fshehur taksave në parajsat fiskale.
Në një kohë që për Shqipërinë është publikuar emri i kompanive “GFI”, “Egnatia Import-Eksport” dhe “Imah”, analisti Arjan Vasjari kujton Prokurorinë se duhet të thellojë hetimet edhe për kompaninë DIA, nëse ka lidhje apo jo me kompaninë “Mossack Fonseca”.
“Nuk mund të them që “Mossack Fonseca” ka instituuar edhe kompaninë “DIA”, por lidhja që bëj unë është kjo: Përderisa aludohet se një nga partnerët e Ismail Mulletit është një përfaqësues i kësaj kompanie, kjo më bën të besoj se për “Mossack Fonseca”-n Shqipëria nuk paska qenë e panjohur”, shprehet analisti, Arjan Vasjari.
Në kërkesën e saj për gjykim, prokuroria thotë se shoqëria “DIA” rezulton e regjistruar në 2010-ën në parajsat fiskale, ndërkohë që akuza nuk dërgoi asnjëherë letërporosi për të mësuar se çfarë transfertash ishin kryer.
“Me zbulimin e “Panama Papers” ka edhe më shumë material, për t’i shkuar në thelb kësaj historie”, thotë Vasjari.
Konsorciumi i gazetarëve ndërkombëtarë disponon 11 milionë dokumente të kompanisë panameze “Mossack Fonseca” që kryente regjistrimin e kompanive “offshore”.
/ Top Channel
