Vetëm 40 cent diferencë kanë vendosur fituesin e një tenderi për sigurimin e automjeteve të një kompanie publike në Ferizaj, në një garë ku të tre ofertat rezultojnë pothuajse identike në çmim, raporton Infosot.
Kompania Rajonale e Mbeturinave “Pastërtia” në Ferizaj ka shpallur fituese kompaninë “Scardian” me ofertën 8,548.16 euro, duke lënë pas dy kompani të tjera me diferencë minimale. Sipas njoftimit zyrtar të prokurimit, oferta e dytë nga “Prisig” ishte 8,548.56 euro, ndërsa ajo e tretë nga “Illyria” arriti në 8,548.59 euro.
Kjo do të thotë se dallimi mes ofertës fituese dhe ofertës së dytë është vetëm 40 cent, ndërsa mes ofertës së parë dhe të tretës vetëm 43 cent, një situatë jo e zakonshme për tenderë publikë ku zakonisht diferencat janë më të theksuara.
Tenderi kishte për objekt “Shërbimet për kryerjen e sigurimeve të automjeteve për nevoja të kompanisë KRM Pastërtia Sh.A.” dhe është zhvilluar në përputhje me procedurat e Ligjit për Prokurimin Publik. Në total janë pranuar tri oferta, të cilat sipas dokumenteve janë konsideruar të përgjegjshme dhe janë vlerësuar mbi bazën e kriterit të çmimit më të ulët.
Në përfundim të vlerësimit, kontrata i është dhënë operatorit ekonomik që ka ofruar çmimin më të ulët, në këtë rast “Scardian”, ndonëse diferencat me konkurrentët janë pothuajse simbolike.
Procedura është zhvilluar nga zyra e prokurimit e KRM “Pastërtia” në Ferizaj, ndërsa vendimi për shpërblimin e kontratës është marrë më 17 prill 2026.
Njoftimi per nenshkrimin e kontrates Pastertia (Dokument)
