Përfaqësuesi i Bashkimit Europian në Kosovë, Samuel Zbogar dhe shefat e misioneve të BE-së sot i kanë shprehur mirënjohje Presidentes Atifete Jahjaga për bashkëpunimin midis tyre për pesë vite. Në komunikatën për media thuhet se diplomatët e BE’së lavdëruan përpjekjet e Jahjagës për të pajtuar ndarjet politike dhe punën e saj në interes të popullit të Kosovës.
Kjo është komunikata e plotë
BE shpreh mirënjohje për Presidenten Jahjaga për dedikimin e saj që Kosova të jetë një vend më i mirë për popullin e saj
Samuel Zhbogar, Shefi i Zyrës së BE-së në Kosovë/Përfaqësuesi Special i BE-së dhe Shefat e Misioneve të BE-së në Kosovë ishin sot nikoqirë të një drekë lamtumirëse për Atifete Jahjaga, Presidenten në largim të Kosovës, për ta falënderuar atë për bashkëpunimin e shkëlqyeshëm gjatë pesë viteve të kaluara.
Diplomatët e BE-së lavdëruan veçanërisht rolin e Presidentes Jahjaga në përpjekjen për të pajtuar ndarjet politike në Kosovë, për të qëndruar mbi politikën partiake dhe për të punuar në interes të popullit të Kosovës në mënyrë unifikuese, duke demonstruar lidership.
“Gjatë pesë viteve të kaluara, Presidentja Jahjaga punoi për ta bërë Kosovën një vend më të mirë për popullin e saj. Ajo mbështeti përpjekjet për luftimin e korrupsionit dhe ngritjen e vetëdijes për dëmin që i shkaktohet zhvillimit të shoqërisë kosovare nga kjo. Presidentja ka qenë një avokate e fuqishme e rritjes së rolit të gruas në Kosovë dhe ka qenë veçanërisht mbështetëse e femrave viktima të dhunës seksuale. Ajo po ashtu punoi me zell në integrimin e të gjitha komuniteteve në jetën publike.
Gjatë punës së saj, Presidentja punoi pa pushim drejt avancimit të aspiratave evropiane të Kosovës dhe përafrimit të saj me vlerat evropiane. Ajo kontribuoi dukshëm në ngritjen e profilit të Kosovës ndërkombëtarisht. E gjithë familja e BE-së në Kosovë i dëshiron Presidentes Jahjaga suksese në jetën e saj personale dhe profesionale.
