Po punohet intensivisht për të krijuar një platformë moderne për shtypjen dhe pagesën online të policave kufitare.
Keshtu ka njoftuar Rrahim Pacolli kryesues i delegacionit të Kosovës për të dialoguar me Brukselin lidhur me kartonin e gjelbër.
Ai shpreson se kjo platformë do të jetësohet më 1 korrik.
“Kjo do të jetë një lehtësi shumë e madhe për personat e interesuar për të blerë policën kufitare, sepse në radhë të parë do të kursejë kohën duke shmangur kështu procedurat dhe pritjet e gjata për tu pajisur me polica të sigurimit në kufi. Kjo platformë do të ju mundësojë bashkatdhetarëve që të blejnë policën e sigurimit online nga të gjithë telefonat smart në çdo kohë”.
“Ndjej shumë keqardhje që ende nuk i është mundësuar Kosovës Kartoni i Gjelbër, por kjo nuk është në duart e mia përderisa arsyeja kryesore është më shumë politike sesa teknike.”
“Pengesë të madhe ka nga shtetet që ende nuk e kanë njohur shtetin tonë, mirëpo unë jam shumë optimist se tani pas rekomandimit pozitiv për liberalizim të vizave dhe pas takimeve që do të kam gjatë muajit Qershor në Bruksel, përfundimisht Këshilli i Byrove do të gjejë zgjidhje të pranueshme për ne”, ka shkruar Pacolli në një postim në Facebook.
Sipas tij, kompanitë e sigurimeve të Kosovës e kanë buxhetin e destinuar për Karton të Gjelbër në vlerë prej 4 milionë euro dhe ky buxhet mund të përdoret si garanci për përmbushjen e të gjitha obligimeve që dalin nga Kartoni i Gjelbër dhe mund të depozitohet në cilën do nga bankat që do të caktohet nga Këshilli i Byrove, vetëm e vetëm për ta përfshirë edhe Kosovën në të.
