Kryeministri bullgar Bojko Borisov e këshillon kolegun e vet maqedonas Nikolla Gruevski që të japë dorëheqje, në mënyrë që të pushojnë protestat dhe përçarjet në vend, shkruan gazeta bullgare “24 Çasa”. “Unë kam dhënë shembull se si e bën këtë një kryeministër nëse nuk e ka besimin për ndonjë arsye. Pastaj populli do ta kthejë besimin”, ka deklaruar Borisovi, i cili në mandatin e vet të parë dha dorëheqje pas protestave pë shkak të çmimeve të larta të gazit. Ai ka shfaqur shpresën se situata në Maqedoni do të vihet nën kontroll dhe se shteti do të rregullohet. “Maqedonia është një vend shumë i rëndësishëm për ne dhe shërbimet në çdo moment më informojnë se si po zhvillohet situata”, ka thënë mbrëmë Borisovi, duke vlerësuar se viktimat që ranë në Kumanovë janë pasojë e përçarjeve dhe problemeve në Maqedoni. Edhe presidenti bullgar Roen Plevneliev, i cili është për vizitë në Mongoli, ka shprehur ngushëllime për viktimat në Maqedoni dhe ka shfaqur brengosje për situatën në vend. /Alsat-M/
