Në një kohë kur zhvillimet në Afganistan po krijojnë të dhëna të reja në fushën diplomatike, presidenti amerikan, Joe Biden, theksoi se SHBA janë në kontakt me talibanët, ndërsa sqaroi se në rast sulmi, do të ketë një përgjigje të menjëhershme dhe të ashpër nga Uashingtoni.
“Kemi bërë një proces të rëndësishëm”, thotë Biden, duke theksuar se SHBA ka siguruar aeroportin e Kabulit dhe po vazhdon me evakuimin e civilëve.
“Ky është një nga fluturimet më të mëdha, më të vështira në histori”, thotë ai.
“Më lejoni të jem i qartë. Ne do të lejojmë të shkojë në shtëpi, çdo amerikan që dëshiron të kthehet”, zotohet ai.
“Nuk mund të premtoj se cili do të jetë rezultati përfundimtar për shkak të rrezikut në terren. Kemi parë imazhe tronditëse të njerëzve në panik që vrapojnë në dëshpërim. Ata janë të tmerruar. Të paktën 5,000 trupa amerikane janë vendosur në aeroportin e Kabulit, me numrin që pritet të rritet në 6,000.”
Presidenti amerikan u përqendrua gjithashtu në operacionin e madh për evakuimin e sigurt të qytetarëve amerikanë nga Afganistani.
Ndërsa Presidenti Biden më parë ka fajësuar afganët për dështimin e Shteteve të Bashkuara për të evakuuar më shumë aleatë përpara marrjes së papritur të pushtetit nga talebanët këtë muaj, zyrtarët amerikanë i thanë agjencisë Associated Press se diplomatët amerikanë kishin kërkuar zyrtarisht javë më parë që administrata Biden të shtonte përpjekjet e evakuimit.
Dhjetëra mijëra njerëz mbeten për t’u evakuuar përpara afatit të 31 gushtit të Shteteve të Bashkuara për të tërhequr trupat e saj nga vendi, megjithëse ritmi u shtua shpejt. Një zyrtar i mbrojtjes tha se rreth 5,700 njerëz, përfshirë rreth 250 amerikanë, u evakuuan nga Kabuli me 16 avionë transporti C-17. Gjatë dy ditëve të mëparshme, rreth 2,000 njerëz në ditë u transportuan me avion.
