Berlusconi do Sabatinin, “dridhet” Galliani

E publikuar: 22/03/2016 11:24
Rreshtat+- AShkronjat+- Printo

Pasi ka kritikuar punën e trajnerit Sinisha Mihajloviç në përfundim të takimit kundër Lacios, numri një i kuqezinjve ka zgjedhur t’ia besojë ekipin e ardhshëm 60- vjeçarit Valter Sabatini, drejtori sportiv i Romës, i cili do të largohet në fund të sezonit nga verdhekuqtë.

Ky është njeriu që Berluskoni beson se do të rimëkëmbë Milanin e tij pas lëvizjeve zhgënjyese të bëra në pesë vitet e fundit në merkato. Që kur kuqezinjtë larguan Pirlon, kanë përfunduar në një kaos nga i cili nuk kanë arritur të dalin akoma.

Megjithatë, “Kavaleri” nuk do ta ketë aspak të lehtë të sigurojë Sabatinin, pasi për të interesohet edhe Xhoi Saputo, pronari multimilioner i Bolonjës. Nëse “Djalli” do të arrijë ta bindë drejtuesin verdhekuq, njeriu më i lumtur për këtë zgjidhje do të ishte vajza e tij, Barbara Berluskoni, e cila nuk ka një marrëdhënie të mirë me administratorin e deleguar të Milanit, Adriano Galiani.

Në fakt, prania e Sabatinit do të kërcënonte pushtetin e drejtuesit kuqezi, i cili, në tridhjetë vitet e presidencës Berluskoni, ka vendosur për çdo lëvizje që është bërë në merkato. Sipas të përditshmes italiane “Il Corriere dello Sport”, Silvio flitet se ka kontaktuar vetëm disa ditë më parë drejtuesin italian, duke i propozuar një rol të rëndësishëm brenda klubit.

Për momentin akoma nuk dihet se si e ka pritur Galiani dëshirën e Berluskonit për të bashkëpunuar me Sabatinin. Administratori historik i Milanit po kalon periudhën më të vështirë qysh kur i është bashkuar 7 herë kampionëve të Europës, teksa kujtojmë se prej dy vitesh tifozët e Milanit kërkojnë “kokën e tij”.