Shefi i Grupit Parlamentar të Lidhjes Demokratike të Kosovës, Ismet Beqiri, ka komentuar situatën e krijuar gjatë seancës së sotme ku opozita bllokoi seancën dhe bëri që ajo të ndërpritet nga kryesuesi i saj, Sabri Hamiti.
Beqiri tha se opozita u mundua të tregojë trimëri në Kuvend. Por, Beqiri, thotë se në Kuvend vendos vetëm shumica.
“Ju e patë se çfarë ndodhi në Kuvend. Ata tentuan që të tregojnë trimërinë e tyre duke e ndalur seancën. Ne e patëm një kërkesë të tillë për ta shtyrë këtë pikë, por ata bënë që të shtyhet e gjithë seanca, gjë të cilën nuk e deshëm. Ata po tregojnë trimëri mirëpo në Kuvend forca matet përmes votave”, tha Beqiri.
Ai, nuk la pa komentuar edhe kërkesën e opozitës sa i përket dorëheqjes së Qeverisë, për të cilën tha se kjo është vetëm një fontanë dëshirash e opozitës.
“Këtë e vendos shumica në Kuvend dhe nuk merrem me komentet e tyre dhe se këto janë vetëm fontinë dëshirash”, tha Beqiri.
