Bayerni i Mynihut fiton duelin e madh me Interin në raundin e parë të ndeshjeve në grupe në Champions League. Kampionët e Gjermanisë treguan se mbeten favoritet kryesore për të fituar Grupin C, ku bëjnë pjesë edhe Barcelona e Victoria Plzen.
Në “San Siro” vendosi goli i Leroy Sane në fraksionin e parë dhe autogoli i D’Ambrosios në pjesën e dytë.
Në ndeshjen tjetër të këtij grupi Barcelona shkatërroi 5-1 Victoria Plzen, me Robert Lewandowskin protagonist absolut në “Camp Nou”. “Bomberi” polak realizoi tre gola, ndërsa dy finalizimet e tjera të “blaugranave” mbajnë firmat e Kessie-t dhe Ferran Torresit. Golin e vetëm të miqve e shënoi Sykora.
Humbje turpëruese 4-1 e Liverpoolit në fushën e Napolit, në sfidën që i përket Grupit A. Edhe pse Osimhen humbi 11-metërsh në minutën e 18-të, skuadra italiane realizoi tre gola në pjesën e parë. E nisi Zielinski, para penalltisë së humbur, më pas shënuan Anguissa dhe Simeone. Në fillim të pjesës së dytë realizoi sërish Zielinski për rezultatin përfundimtar 4-1.
Tottenhami i Contes triumfoi 2-0 ndaj Marseille me të dy golat të shënuar nga Richarlison, ndërsa Atletico Madrid fitoi në shtesë ndaj Portos me golin e Hermosos./tch/
