Ministri i Mjedisit dhe Planifikimit Hapësinor, Ferid Agani, ka takuar të enjten drejtorin e Bankës Botërore në Kosovë, Jan-Peter Olters, së bashku me përfaqësuesit e misionit të kësaj banke të ngarkuar për përpilimin e strategjisë për programin e partneritetit me Kosovë për periudhën e ardhshme pesë vjeçare.
Në këtë takim ministri Agani, falënderoi përfaqësuesit e Bankës Botërore, për kontributin e tyre dhënë Kosovës gjatë kësaj periudhe të rëndësishme për zhvillimin e Kosovës në rrafshin e zhvillimit ekonomik dhe në ngritjen e kapaciteteve humane të Institucioneve të Republikës së Kosovës, njofton kumtesa ministrore.
Përfaqësuesit e BB-së e informuan ministrin Agani mbi vizitën e cila ka për qëllim të realizojnë një diagnostifikim të nevojave të Kosovës me theks në përkrahjen në fushat e papunësisë dhe participimit të ulët të fuqisë punëtorë si dhe në fushën e përkrahjes së rritjes ekonomike përmes prodhimtarisë vendore.
Projektet që do të ulnin shkallën e ndotjes në rajonin e Mitrovicës, me theks në kompleksin industrial “Trepça” si dhe vazhdimi i projektit “Ibër Lepenci”, u veçuan si ide të cilat BB dhe MMPH do të jenë të fokusuar gjatë periudhës së ardhshme.
