Artikulli i gjatë i gazetës amerikane “The New York Times” rreth pjesëmarrjes së kosovarëve në luftërat e ISIS’it ka nisur të bëhet edhe më shqetësues.
Artikulli i kësaj të përditshmeje, gati se i bindi drejtuesit e një kompanie të madhe gjermane që t’i jepnin fund planit të tyre për të investuar në Kosovë.
Përmes kësaj letre që e ka siguruar KTV’ja dhe që është shkruar vetëm dy ditë pas publikimit të artikullit, njëri nga drejtuesit e kësaj kompanie ka kërkuar përgjigje nga njëra prej organizatave të biznesit, duke kërkuar informata më të thella rreth asaj që e kishte parë në këtë artikull.
Kjo u kishte sjellë goxha mund drejtuesve të njërës prej organizatave të biznesit për ta bindur të njëjtin që të mos e ndërpresë planin investues.
Sipas tij, fatkeqësisht, vendi po vazhdon të vuajë nga imazhi tejet negativ nga i cili edhe po vazhdojnë të humbin interesin e investitorëve të jashtëm.
Viteve të kaluara, qeveria shpenzoi miliona euro për t’i bërë reklamë Kosovës në shumë media ndërkombëtare, por përpos që e njëjta nuk solli ndonjë përfitim, për më keq, doli të jetë e kopjuar.
