Angela Merkel, e cila në kujtimet e saj të reja ngre frikë për rendin demokratik perëndimor me Donald Trump si president i SHBA-së, ka shprehur gjithashtu shqetësime të thella për rolin e madh që do të luajë Elon Musk në administratën e Trump.
Sipas mediave të huaja, përcjell Telegrafi, ish-kancelarja gjermane, së cilës gjatë mandatit të parë të Trump iu dha nga disa vëzhgues emërtimi i “udhëheqësit të botës së lirë” që zakonisht rezervohet për presidentët e SHBA-së, tha se 16 vjet në pushtet i kishin mësuar asaj se interesat e biznesit dhe ato politike duhet të mbahen në ekuilibër të mirë.
E pyetur nga revista Der Spiegel në një intervistë nëse sfida e paraqitur nga Trump ishte rritur që kur ai u zgjodh për herë të parë në 2016, Merkel u përgjigj: “Tani ekziston një aleancë e dukshme mes tij me kompanitë e mëdha nga Silicon Valley, të cilat kanë fuqi të madhe përmes kapitalit”.
Musk, i cili po këshillon Trump për mandatin e tij të dytë, është ngarkuar nga presidenti i zgjedhur të drejtojë një departament të sapokrijuar të efikasitetit të qeverisë së bashku me Vivek Ramaswamy.
Merkel tha se “ngatërresat financiare” të shefit të SpaceX dhe Tesla e bënë një emërim të tillë shumë problematik.
“Nëse një person si ai është pronar i 60% të të gjithë satelitëve që orbitojnë në hapësirë, atëherë kjo duhet të jetë një shqetësim i madh për ne së bashku me çështjet politike”, tha ajo. “Politika duhet të përcaktojë ekuilibrin shoqëror midis qytetarëve të fuqishëm dhe atyre të zakonshëm”.
Ajo vuri në dukje se në krizën financiare 2007-08 gjatë mandatit të saj të parë si kancelare gjermane, “sfera politike ishte autoriteti përfundimtar që mund t’i rregullonte gjërat” me masa të tilla si paketat e shpëtimit të shoqëruara me rregullore të reja.
“Dhe nëse ky autoritet përfundimtar është shumë i ndikuar nga kompanitë, qoftë përmes fuqisë kapitale apo aftësive teknologjike, atëherë kjo është një sfidë e paprecedentë për të gjithë ne”, citohet të ketë thënë Merkel, në memoaret prej 700 faqesh që do të publikohen.
Ajo tha se një nga standardet që veçon shoqëritë e lira ishte kontrolli i qartë i fuqisë së korporatave dhe ndikimi i ultra të pasurve.
“Në një demokraci, politika nuk është kurrë e pafuqishme kundër kompanive”, ka shtuar ajo.
Merkel pranoi se kishte mbështetur Hillary Clinton dhe Kamala Harris në garat e tyre përfundimisht të pasuksesshme presidenciale kundër Trump dhe tha se disfatat e tyre e kishin mbushur me trishtim.
Kujtojmë se Musk, njeriu më i pasur në botë, bëri fushatë të fortë për Trump dhe po ndihmon në menaxhimin e tranzicionit të tij në Shtëpinë e Bardhë.
Pronat e korporatave të Musk thuhet se kanë marrë 15 miliardë dollarë në kontrata publike, një shifër që pritet të rritet gjatë mandatit të Trump.
