Milan-Juventus është gjithmonë Milan-Juventus pavarsisht pozicionit që kanë të dyja skuadrat në tabelën e klasfikimit. Këtë të Shtunë në San Siro kuqezinjtë dhe bardhezinjtë do të përballen sërish në një sfidë shumë të rëndësishme për ecurinë e të dyja këtyre ekipeve në këtë sezon të Serisë A, italiane. Massimiliano Allegri do të ritkthehet në stadiumin ku u bë i njohur si trajner me objektivin për të thelluar krizën e Milanit, edhe pse trajneri livornez e di që Juventusin e tij nuk e pret një ndeshje e thjeshtë.
” Do të kthehem në një stadium ku jam ndierë shumë mirë për vite me rradhë. Gjithsesi në dy sezonet e fundit jam ndierë gjithashtu shumë mirë edhe në Torino. Dua të fitoj kampionatin e dytë radhazi me bardhezinjtë sepse pavarsisht se cfarë thuhet nuk kemi fituar ende asgjë. Duhet të ruajmë përqëndrimin. Ndeshja ndaj Milanit është shumë e rëndësishme për ne, ndërsa pas kësaj sfide mbeten edhe 6 takime të tjera për tu luajtur. Duhet të bëjmë një paraqitje të shkëlqyer. Milani lufton për një vend në Europa League kurse ne duhet të mendojmë që nga kjo ndeshje mund të varet një pjesë e mirë e sezonit”.
Në vijim Allegri konfirmoi mungesën e Dybalas i cili do të rikthehet në stërvitje të Mërkurën e ardhshme, ndërkohë që theksoi se Rugani do të luajë titullar ndaj kuqezinjëve pasi është një lojtar që i ka të gjitha mundësitë për të bërë mirë. Në krahun tjetër trajneri i Milanit Sinisa Mihajlovic përcaktoi objektivat e skuadrës së tij ndërkohë foli edhe për të ardhmen, pa anashkaluar sfidën e kësaj të Shtune ndaj Juventusit.
” I detyrohemi tifozëve tanë dhe drejtuesve ta përfundojmë kampionatin në vendin e 6-të dhe të fitojmë Kupën e Italisë. Është normale që e ardhmja ime të jetë në diskutim, dhe nëse do të bëjmë keq në sfidat e ardhshme është gjithashtu mëse normale që të shkarkohem nga detyra. Gjithsesi për një gjë të jeni të sigurtë unë do të jap gjithmonë maksimumin nga vetja në këtë aventurë. Ndaj Juventusit do të jetë një ndeshje e vështirë në të cilën ne duhet të luajmë si në atë periudhë kur gjërat shkonin mirë”.
