Ka hiç më pak se 9 muaj, që aktorët e Teatrit të Gjilanit janë duke punuar pa asnjë cent.
Gjatë kësaj periudhe, aktorëve nuk u është dhënë asnjëherë pagë gjatë këtyre muajve.
Për më tepër, me këto kushte nuk janë duke u përballur vetëm punonjësit e rinj të teatrit.
Ramadan Kurti ka 35 vjet që punon si aktor dhe ai thotë që kushtet në teatër janë shumë të vështira.
Kurti pohon se komunës së Gjilanit i japin vetëm një javë kohë që aktorëve t’ua japin pagat që u takojnë, ose në të kundërtën paralajmërojnë protestë.
Të njëjtën bindje e kanë edhe aktorët e tjerë gjilanas, të cilët kërkojnë një zgjidhje të menjëhershme nga udhëheqësit e Komunës.
Ata thonë që udhëheqësit komunalë krejt çfarë u kanë ofruar deri tash kanë qenë fjalë premtuese.
Opozita në këtë qytet vlerëson se teatri po mbyllet, si pasojë e neglizhencës së institucioneve komunale.
Në anën tjetër, krahas gjithë kësaj gjendjeje, kryetari i Gjilanit Lutfi Haziri, ndihet shumë komod.
Ai nuk ngurron të thotë se teatri i Gjilanit ofron kushte të kënaqshme për punë, duke mos pranuar në asnjë mënyrë të flasë për pjesën e pagesave.
Teatri i Gjilanit ka të angazhuar 16 aktorë, të cilët presin pagat nga Komuna e Gjilanit.
