Përderisa shumica e aeroporteve në botës kanë hotele, Aeroporti Ndërkombëtar i Prishtinës “Adem Jashari” nuk ka një të tillë dhe nuk planifikon të ndërtojë as në të ardhmen, edhe pse disa udhëtarë të këtij aeroporti dëshirojnë të ketë hotel meqë ka udhëtime natën dhe ndonjëherë vonesa të aeroplanëve.
Zëdhënësja e Aeroportit Ndërkombëtar të Prishtinës “Adem Jashari”, Valentina Gara ka thënë se ky aeroport nuk ka hotel dhe nuk kanë planifikuar me pas, meqë është menduar se nuk ka nevojë, transmeton ksp.
“Në hapësirat e Aeroportit Ndërkombëtar të Prishtinës “Adem Jashari” nuk ka hotel. Po ashtu, ne nuk kemi planifikuar që në të ardhmen të ndërtojmë ndonjë hotel. Kjo për shkak të çështjes komerciale, të cilën nuk e kemi të nevojshme. Po ashtu, pozicionimi i aeroportit nuk është larg prej hoteleve të cilat janë të ndërtuara përreth. Për këtë arsye nuk kemi në plan të ndërtojmë një herë për një herë ndonjë hotel”, ka thënë zëdhënësja Gara.
Ajo thotë se në vendet e rajonit aeroportet nuk kanë hotele, ndërsa ka plotë aeroporte të botës që kanë hotele apo afër aeroportit, siç janë Aeroporti i Cyrihut, Frankfurtit dhe aeroporte të tjera. Mirëpo sipas saj ato aeroporte shërbejnë edhe transit ku kanë edhe klientë të ndryshëm.
Prej të gjithë udhëtarëve që janë pyetur në hapësirat e Aeroportit të Prishtinës, kanë kërkuar që ky aeroport modern të ketë edhe hotel.
Feim Dikaj, i cili jeton në Francë thotë se do të ishte mirë të ketë hotel në aeroport, meqë ka udhëtime edhe natën me aeroplan dhe vonesa të ndryshme.
Edhe Elfete Gerbeshi thotë se më mirë kishte me qenë me pas aeroporti një hotel. Ajo ka treguar edhe disa raste nga udhëtimi dhe vonesat e aeroplanëve.
“Ne udhëtojmë prej Prishtinës për Bazel dhe kanë hotele. Normalisht që do të ishte e nevojshme, neve na bie të vimë natën. Para dy muajve kam ardhur në orën 4:00 të mëngjesit, kam qenë e sëmurë dhe ka pas avioni vonesë”, thotë Gerbeshi.
Edhe një udhëtar ndërkombëtar thekson se sikur shumë aeroporte, edhe ky aeroport duhet ta ketë hotelin për pushim dhe qëndrim të përkohshëm të udhëtarëve.
Aeroporti i dhënë me koncesion për 20 vjet nga autoritet qeveritare të Kosovës, kompanisë turke “Limak” ka bërë disa investime të planifikuara në bazë të marrëveshjes.
