Aleanca për Ardhmërinë e Kosovës, ka lëshuar një njoftim, përmes të cilit thotë se nuk do të hyjë në Qeveri por do të vazhdojë rrugën e nisur me dy partitë tjera opozitare. Ndërkaq, ka paralajmëruar se do të shihet me gjyq me ata që po shpifin në adresë të AAK’së dhe të Familjes Haradinaj.
Partia e Ramush Haradinajt ka reaguar për shkrimet në media se AAK do të përfshihet në qeverisje me PDK dhe LDK.
Kjo parti përmes një komunikate për media hedh poshtë këta zëra dhe e quan luftë speciale.
Kjo është komunikata e plotë e AAK-së:
Shkrimet e fundit në media për gjoja një koalicion të ri qeverisës ku do të përfshihej edhe AAK, janë trillime ordinere, që për qëllim kanë diskreditimin e AAK-së dhe Liderin e saj Ramush Haradinaj.
Për hirë të informimit të saktë, e njoftojmë opinionin publik, se nuk ka asgjë të vërtetë nga pazaret imagjinare për një qeveri ku do të përfshihej AAK-ja, dhe se kjo parti, së bashku edhe me dy partitë tjera opozitare, do të vazhdojë kauzën e saj të drejtë e të vendosur në ndaljen e degradimit të mëtutjeshëm të qeverisjes së vendit.
Ata që e kanë katandisur vendin në këtë gjendje duhet të japin përgjegjesi, e jo të përfshihen në trillime ordinere, për gjoja marrëveshje të AAK-së me koalicionin PDK-LDK. Se cili do të jetë qëndrimi i AAK-së për qeverisjen në vend, në besojmë se qeveria, do ta marrë përgjigjen me 17 shkurt.
Në vazhdën e sulmeve të paskrupullta ndaj AAK-së dhe kryetarit të saj Haradinaj, që janë sforcuar kohëve të fundit, i shohim edhe shkrimet e fundit të gazetës Bota Sot, e cila përpiqet të sajojë ngjarje të paqena, duke e lidhur familjen Haradinaj, me vrasje të cilat tashmë janë zbardhur nga drejtësia dhe për të cilat janë gjetur fajtorët.
Njëkohësisht u bëjmë me dije të gjithë atyre që shpifin dhe trillojënë kundër nesh, se AAK do ta ndjekë praktikën e deritashme dhe me ta do të shihemi në gjyq.
AAK si parti politike, do të vazhdojë të jetë e palëkundur në mbrojtjen e interesave të Kosovës dhe të qëytetarëve të saj, pavarësisht se sat ë forta do të jenë shpifjet kundër saj!.
