Aleanca për Ardhmërinë e Kosovës e konsideron si tendencioze dhe pjesë të fushatës speciale, pretendimet se, siç thotë kjo parti, kinse 7 fshatra të Kaçanikut të organizuara brenda një nëndege paskan kaluar në LDK.
“AAK e vlerëson lartë dhe shumë pozitive përkushtimin në punë të kryetarit të degës së AAK-së në Kaçanik,Ylber Bajra, bashkë me strukturën udhëheqëse të saj për rimobilizim të radhëve në terren dhe reformë të thellë në të gjitha nivelet brenda degës së Kaçanikut”, thuhet në reagimin e AAK-së. “Për më tepër, si rrjedhojë e diskursit politik, AAK-së çdo ditë e më shumë po i shtohen radhët nga ish-aktivistë dhe simpatizantë të subjekteve politike që e kanë katandisur Kosovën për së keqi me kualitetin e tyre të ulët qeverisës, madje edhe duke i dhuruar Kosovës edhe dy marrëveshje të dëmshme që e cenojnë rendin kushtetues dhe sovranitetin e shtetit”, thuhet më tej aty.
Sipas AAK-së, se sa është kjo e vërtetë, më së miri e dinë ata të cilët në vazhdimësi po porosisin dhe lansojnë lajme të rrejshme dhe propaganduese për AAK-në në tërësi.
“AAK konsideron se individë të caktuar kanë kaluar dhe gjithnjë do të kalojnë nga një parti në një tjetër në këmbim të favoreve dhe punëdhënies, por kësaj radhe LDK është e fundit e cila duhet të llogaris se forcimi i saj do të vjen nga strukturat e cilës do parti opozitare dhe kjo duke u nisur nga fakti thelbësor se struktura udhëheqëse e saj është përgjegjëse që kontrabanduan vullnetin qytetar dhe shtetin e kanë futur në një krizë edhe më të thellë duke mos lejuar të ndodhë ndryshimi në Kosovë”, thuhet në reagim.
