Te Juventusi nuk mund të fërkojnë duart sepse Andres Iniesta do të bëjë gjithcka për të qenë në finalen e madhe të Berlinit. Mesfushori spanjoll po punon fort për të qenë gati të Shtunën. Dicka të tillë e pranoi vetë Iniesta në deklaratën për mediat.
” As që më shkon nëpër mend se mund të mungoj në finale. Ndiej vetëm pak dhimbje asgjë më shumë. Shpresoj që nga sot e deri të Shtunën gjërat të shkojnë mirë për mua dhe të mund të luaj në finale. Dëshiroj të ndihmoj skuadrën të ngrejë lart trofeun e Championsit, që të mbyllim në mënyrën më të mirë një sezon fantastik për ne”.
Më pas Iniesta u përqëndrua te kundërshtari. Sipas tij Juventusi është një ekip për tu patur frikë pasi ka arritur me meritë deri në finale.
” Nuk mendoj se ka një skuadër favorite në këtë finale. Do të kemi përballë një ekip që nuk di vetëm të mbrohet. Nuk e ndiejmë veten favoritë, madje do të ishte një gabim i madh nëse mendojmë dicka të tillë. Allegri? Ai i respekton shumë futbollistët tanë ashtu sic respektojmë edhe ne lojtarët e Juventusit. Pastaj nuk duhet të harrojmë që ata kanë në skuadër një futbollist ekspert si Pirlo”.
Në të njëjtën linjë me Andres Iniestan u shpreh edhe trajneri i Barcelonës Luis Enrique. 45-vjecari asturian u bëri thirrje futbollistëve të tij të kenë kujdes nga Juventusi pasi sipas Enriques bardhezinjtë janë një kundërshtar shumë i rrezikshëm.
” Ne i njohim mirë ata. Janë një skuadër shumë e fortë dhe për më tepër kanë zhvilluar një sezon të jashtëzakonshëm. Juventusi ka fituar Serinë A dhe Kupën e Italisë dhe është me meritë në finalen e Championsit. Ndaj tyre do të jetë një ndeshje shumë e bukur me një intensitet të madh. A është kjo ndeshja më e rëndësishme për ne? Nuk kam menduar për dicka të tillë, deri tani kemi bërë paraqitje shumë pozitive në Champions League. Messi? Nuk kam asnjë dyshim Leo mund ti shënojë çdo skuadre”.
