Porto dhe Barcelona kanë bërë një hap të madh drejt kualifikimit në gjysmëfinale të Ligës së Kampionëve pas fitores me rezultat identik 3:1 ndaj Bayern Munichut, përkatësisht Paris Saint-Germain.
Skuadra portugeze e shkeli befasisht gjigantin bavarez që i pagoi shtrenjtë mungesat e disa prej futbollistëve kryesorë përfshirë mesfushorët Arjen Robben e Franck Ribery. Ricardo Quaresma kaloi vendasit në epërsi në minutën e katërt kur realizoi nga penalltia.
I njëjti futbollist shfrytëzoi një gabim të mbrojtësit Dante për ta dyfishuar avantazhin në minutën e 10-të.
Por, Bayern u kundërpërgjigj me golin e Thiago Alcantaras në minutën e 28-të, rezultat me të cilin u mbyll pjesa e parë. Mirëpo, pas intervalit Porto shënoi sërish në portën e Manuel Neuer. Jackson Martinez depërtoi përpara dhe dribloi edhe Neuerin duke shënuar golin e tretë të Portos.
Me këtë fitore, skuadra e trajnerit Julen Lopetegui është në pozitë të mirë të shkaktojë befasi duke e eliminuar një prej favoritëve kryesorë për titull. Me rezultat identik fitoi edhe Barcelona në Parc des Princes, ndeshje në të cilën shkëlqeu heroi i El Clasicos, Luis Suarez.
Neymar kaloi gjigantin katalan në epërsi në minutën e 18-të, rezultat me të cilin u mbyll pjesa e parë. Por, pas intervalit doli në skenë Suarez.
Ylli uruguaian e dyfishoi avantazhin pas një solo depërtimi në minutën e 67-të. I njëjti futbollist në mënyrë edhe më të jashtëzakonshme e dribloi David Luizin dhe shënoi golin e tretë të Barcelonës në minutën e 79-të.
Kurse, vendasit realizuan golin e ngushëllimit nëpërmjet Gregory van der Wiel, goditja e së cilit u devijua nga Jeremy Mathieu dhe përfundoi në rrjetë. Ndeshjet e kthimit zhvillohen të martën.
/zeri/
