Sekretari i Përgjithshëm Jens Stoltenberg mirëpriti kryeministrin e Malit të Zi Millojko Spajiq në selinë e NATO-s paraditen e së premtes. Ata diskutuan përgatitjet për Samitin e ardhshëm të Uashingtonit dhe përpjekjet e vazhdueshme për të forcuar Aleancën.

Sipas njoftimit për media të NATO-s, Stoltenberg theksoi rolin kritik të Malit të Zi në sigurimin e stabilitetit në Ballkanin Perëndimor. Ai përshëndeti angazhimet e forta të kryeministrit për reforma, si dhe rrugën e Malit të Zi drejt integrimit euroatlantik.

Duke dënuar shpërthimet e dhunës të vitit të kaluar në Kosovë, Sekretari i Përgjithshëm theksoi reagimin e shpejtë të NATO-s, “duke vendosur 1000 trupa shtesë dhe forca të blinduara të rënda”.

Ai nënvizoi se NATO është “e përkushtuar të sigurojë që KFOR-i të vazhdojë të përmbushë mandatin e tij të OKB-së”.

Stoltenberg përmendi kontributet e Malit të Zi për sigurinë e Aleatëve, duke përfshirë vendosjen e trupave në grupet e betejës shumëkombëshe në Bullgari dhe Letoni.

Mali i Zi gjithashtu kontribuon në “ndërtimin e forcave më efektive dhe gjithëpërfshirëse të sigurisë” si pjesë e misionit të trajnimit të NATO-s në Irak, shtoi ai.

Sekretari i Përgjithshëm vuri në dukje gjithashtu se ambasadorët e NATO-s do të vizitojnë Sarajevën javën e ardhshme, duke e quajtur këtë “një demonstrim të mbështetjes së fortë për sovranitetin dhe integritetin territorial të Bosnje-Hercegovinës”.

Për mbështetjen për Ukrainën, Stoltenberg falënderoi Malin e Zi për kontributet e tij nëpërmjet Paketës Gjithëpërfshirëse të Ndihmës së NATO-s (CAP) dhe u kërkoi aleatëve të vazhdojnë të rrisin mbështetjen për Ukrainën në këtë kohë kritike.

Sekretari i Përgjithshëm tha se “hyrja e Suedisë në NATO do ta bëjë të gjithë Aleancën më të fortë”.

Ai falënderoi Presidentin e Turqisë, Recep Tayyip Erdogan për nënshkrimin e shpejtë të ratifikimit të fundit të anëtarësimit të Suedisë në NATO nga Asambleja e Madhe Kombëtare e Turqisë, “dhe mezi pres ratifikimin e Hungarisë sapo të mblidhet parlamenti”. /Klankosova.tv