Humbja 86-80 në Shkup përballë maqedonasve të Kozuv nuk e dëmton aspak ekipin kosovar që siguron biletën e finales së madhe sezonale
22 pikë nga Dardan Berisha dhe 20 të tjera nga Edin Bavcic i dhurojnë finalen e Ligës Ballkanike Sigal Prishtinës. Humbja 86-80 në Shkup përballë maqedonasve të Kozuv nuk e dëmton aspak ekipin kosovar që siguron biletën e finales së madhe sezonale ku ka mundësi të triumfojë në evenimentin prestigjoz të gadishullit.
Suksesi 85-61 i ndeshjes së 1 Prillit në Prishtinë i siguroi komoditetin Sigal Prishtinës për të luajtur e qetë dhe për të kontrolluar diferencën e rezultatit në Shkup. Kozuv përfitoi nga mbështetja e tifozëve vendas duke e nisur ndeshjen vrullshëm me 6 pikë rresht, por Berisha udhëhoqi sulmin e skuadrës kosovare me një 3 pikësh që i ngushtoi diferencat në 12-8. Me kalimin e minutave takimi u bë më i ekujlibruar dhe skuadra e Prishtinës mori masat për t’iu kundërpërgjigjur ekipit maqedonas dhe ishte Trajkovski me një 3 pikësh që ngushtoi diferencën në -1. Ky ishte momenti i Edin Bavcic që me 2 tre pikësha të saktë kaloi në avantazh Sigal Prishtinën që e mbylli pjesën e parë 26-25. Ishin Janjusevic dhe Bogojev që ngrinë skuadrën mike me 8 pikë që rikthyen në avantazh Kozuv 40-34 rreth 5 minuta nga fundi i pjesës së dytë. Gjatë këtij fraksioni, Prishtina vuajti dukshëm goditjet e maqedonasve për 3 pikë, por Mavunga mendoi për të rikthyer qetësinë me një goditje të saktë nga rreth 8 metra, ndërsa Berisha u rikthye me një 2 pikësh për të ngushtuar diferencën në 4 pikë. Hulls shtoi një tjetër 3 pikësh, ndërsa Bavcic barazoi për të tretën herë takimin. Gjithsesi, pjesa e parë u mbyll në avantazhin minimal të dy pikëve për vendasit që u rikthyen në lojë pas një 10 minutëshi të mirë. Kozuv tentoi të krijonte avantazhin e nevojshëm për të siguruar finalen edhe në periodën e tretë, por Bavcic u rikthye spektakolar si në periodën e parë për të mos lejuar arratinë e maqedonasve.
Në skenë doli edhe Dardan Berisha me një 3 pikësh të rëndësishëm pak sekonda nga fundi duke e ngushtuar disavantazhin në -3 pikë por Kozuv e mbylli fraksionin e tretë me avantazhin 73-66. Gjatë periodës së katërt, Prishtina nuk preferoi të bënte vetëvrasje duke kontrolluar rezultatin dhe diferencën e pikëve për të siguruar finalen edhe me një humbje 86-80. Tashmë në rrugën e Prishtinës është skuadra bullgare e Rilski Sportist, e cila do të sfidojë kampionët e Kosovës në dy finale të zjarrta që do të vijnë ekzkluzivisht në SuperSport. Rilski Sportist eleminoi në gjysmëfinale skuadrën e Pejës pasi triumfoi në ndeshjen e dytë 82-66, duke kthyer në favor disavantazhin prej 1 pikë të sfidës së parë./ss/
