Pak javë pas suksesit në Indian Wells, tenisti serb mbron edhe titullin e turneut që u luajt në Florida.
Novak Djokovic rrëmben gjithçka që i del përpara në vitin 2015 dhe një gjë të tillë e bën edhe me turneun e Miamit. Pak javë pas suksesit në Indian Wells, tenisti serb mbron edhe titullin e turneut që u luajt në Florida pasi kaloi në finale britanikun Andy Murray, i cili krijoi përkohësisht iluzionin se mund ta thyente rivalin serb pas 6 takimesh pa fitore ndaj tij. Finalja e luajtur në tre sete krijoi vetëm shkëndija shprese për Murray që mbylli në favorin e tij setin e dytë por u rrëzua si një kështjellë rëre në të tretin. Murray e nisi sfidën me një mundësi të artë pasi kaloi në avantazh 2-1 me topat e kundërshtarit, por tenisti serb u kundërpërgjigj menjëherë duke vendosur barazpeshën. Britaniku u rikthye favorit në lojën e shtatë pasi arriti sërish ta thyente ballkanasin me topat e tij për të vendosur avantazhin e përkohshëm 4-3, por numri 1 i botës ia ktheu me të njëjtën monedhë.
Seti i parë nuk pati më të papritura sepse të dy tenistët respektuan topat në dispozicion duke e çuar sfidën në barazim 6-6. Ky ishte momenti kur Nole bëri diferencën në çimenton e Miamit duke i mbyllur llogaritë në Tie Break 7-3. Në setin e dytë, loja shkoi e barabartë pothuajse deri në fund, por britaniku u shfaq më i freskët duke i rrëmbyer një game me break për t’i mbyllur llogaritë 6-4. Gjithsesi, puna e mirë që bëri në këtë set nuk u reflektua në atë pasardhës ku Djokovic imponoi klasin e tij për ta turpëruar kundërshtarin me një 6-0 të pastër që e konfirmon si tenistin e momentit pasi një start të tillë ai nuk i bënte vitit që prej 4 sezonesh.
Aktualisht, Djokovic mbretëron në krye të fronit ATP që prej 141 javësh, ashtu si Rafael Nadal disa vjet më parë. Suksesin e dyfishtë Indian Wells-Miami Open, Nole e kishte arritur edhe në vitin 2011, duke u bërë i pari tenist në erën Open që regjistron një arritje të tillë. Në krahun tjetër, Murray nuk arriti t’i bënte dhuratën e duhur të fejuarës Kim me të cilën do të shkojë drejt altarit javën e ardhshme.
