Zyrtarë serbë, të cilët punojnë në institucionet e Kosovës, po u bëjnë thirrje përfaqësuesve të Listës Serbe të ndërpresin bojkotin dhe të kthehen në institucione.
Darko Dimitrijeviq, kryesues i Këshillit konsultativ për komunitete, pranë Zyrës së presidentes Atifete Jahjaga, thotë se Lista Serbe nuk duhet të paraqesë kushte, por të kthehet në institucione dhe të mbrojë interesat e serbëve.
“Ngrirja e punës në Qeveri e Kuvend nga serbët është ide e keqe. Ka procese që nuk mund të presin dhe nuk po realizohen, për shkak të ikjes së tyre. Lista Serbe duhet t’i kthehet sa më shpejt punës nëpër institucione dhe të kryejë detyrat e dhëna nga populli serb në zgjedhje. Edhe për votimin e Gjykatës Speciale duhet të kthehen medoemos”, tha Darko Dimitrijeviq, raporton Top Channel.
Pas mbledhjes së Këshillit konsultativ, Dimitrijeviq tha se lideri i Listës Serbe, Aleksandar Jabllanoviq nuk duhet të kërkojë nga zyra që të lejohen qytetarët serbë të shkojnë në Gjakovë, por duhet të niset ai i pari, bashkë me qytetarët.
“Që në fillim është bërë një gabim, pasi ish-ministri Jabllanoviq, në vend të deklaratave të dhëna, do të duhej të ishte në krye të kolonës së serbëve që donin të vizitonin Gjakovën. Mendoj se atë, si ministër nuk do ta kishte ndalur askush. Situata, edhe tani me kërkesat që ka Lista Serbe, është krejt e paqartë”, tha ai.
Dimitrijeviq vlerëson se vazhdimi i bojkotit të Listës Serbe nuk shkon në asnjë rast në dëm të shqiptarëve, por vetëm në dëm të serbëve të Kosovës, të cilët sipas tij kanë shpresuar se kjo partis serbe do të punojë për zhvillimin e lokaliteteve të tyre në Kosovë.
Zyrtarët e Listës Serbe kanë paralajmëruar mundësinë e rikthimit në institucionet kosovare, por ende nuk kanë saktësuar kohën e rikthimit.
