Kryetar i Aleancës për Ardhmërinë e Kosovës, Ramush Haradinaj nuk kishte braktisur ceremoninë për ndarjen e dekoratave nga ana e presidentit të Shqipërisë, Bujar Nishani.
Megjithëse, në disa medie ka qarkulluar lajmi se Haradinaj ishte ‘rebeluar’ me ulësen që ia kishin dedikuar atij, ndryshe përgjigjet AAK-ja. Sipas tyre, po atë ditë, më 16 shkurt të muajit të kaluar, kreu i kësaj partie kishte një agjendë tjetër.
“Nuk qëndrojnë ato qe janë thënë për kryetarin Haradinaj. Atë ditë është shpalle qytetar nderi i Tiranës dhe mos prezenca e tij ka qenë konflikt agjendash dhe asgjë tjetër”, thuhet në njoftimin për “Zërin” nga AAK-ja.
Ndryshe, me rastin e 7-vjetorit të Pavarësisë së Kosovës, Presidenti i Republikës, Bujar Nishani i akordoi intelektualit elitar, i dëshmuar me publikime të rëndësishme profesionale, por edhe artistike; Oficerit madhor, kërkuesit shkencor të teorisë dhe praktikës në artin e luftës.
Njërit nga ideatorët dhe projektuesit e bërthamave të strukturave të para institucionale ushtarake; Ministrit të parë dhe themeluesit të Forcave të Armatosura të Republikës së Kosovës, Ahmet Krasniqit (pas vdekjes) Dekoratën “Gjergj Kastrioti Skënderbeu”.
Kreu i Shtetit vlerësoi me Dekoratën “Nderi i Kombit” pas vdekjes veprimtarët e shquar, luftëtarët, ushtarakët, atdhetarët: Salih Çekaj, Zahir Pajaziti, Tahir Zemaj, Agim Ramadani, Ekrem Rexha (Drini), Indrit Cara, Luan Haradinaj, Bekim Berisha (Abeja), Fehmi Lladrovci, Xhevë Krasniqi-Lladrovci, Smajl Hajdaraj.
Dhe me “Dekoratën e Artë të Shqiponjës” Enver Malokun, Xhemal Mustafën, Shaban Manajn, Latif Berishën, Ukë Bytyqin si dhe me Titullin “Për merita të veçanta civile” Ismet Rracin, Agim Hajrizin, Haki Imerin.
