Numri i azilkërkuesve në shtetet anëtare të Bashkimit Evropian është rritur për 44 për qind më 2014, duke arritur kështu në 626,000 sosh.
Të dhënat për azilkërkuesit, të publikuara në një raport të lëshuar nga Eurostat, zyra statistikore e Bashkimit Evropian, tregojnë se 191,000 njerëz më shumë kanë aplikuar për azil në shtetet evropian më 2014 në krahasim me një vit më parë.
Refugjatët nga Siria kanë kryesuar këtë ranglistë, me 122,800 azilkërkues në krahasim me 50,000 më 2013. Më shumë se 70,000 sirianë kanë aplikuar për statusin e refugjatit vetëm në Gjermani e Suedi.
Emigrantët afganë zunë vendin e dytë si grupi i dytë më i madh me 41,300 azilkërkues që kanë aplikuar për mbrojtje në BE.
E Kosova zuri vendin e tretë, me 37,900, më shumë se gjysma e së cilëve aplikuan për azil në Hungari.
Në ndërkohë, BE-ja po planifikon masa për të ndaluar refugjatët në Mesdhe, raporton zeri.
Tani që vera po afron, një numër i madh i refugjatëve pritet të arrijë në Evropë nga deti, veçanërisht nga vendet e prekura nga konflikti në Lindje të Mesme dhe në Afrikë të Veriut.
Disa organizata për të drejtat e njeriut, përfshi OKB-në, Amnesty International dhe Human Rights Watch, kanë kritikuar shtetet e BE-së se kanë kufizuar numrin e pranimit të refugjatëve.
