Nënkryetari i Kuvendit të Kosovës dhe anëtari i kryesisë së PDK-së, Xhavit Haliti, ka reaguar ndaj deklaratave të bashkëpartiakut të tij, Bajram Rexhepit, i cili ka thënë se Shërbimi Inteligjent i Kosovës ka uzurpuar Partinë Demokratike të Kosovës dhe institucionet e vendit.
Haliti në një prononcim për “Zërin” ka thënë se kryesia e PDK-së duhet ta shqyrtojë këtë deklaratë të ish-ministrit të Punëve të Brendshme.
“Besoj se kryesia e partisë duhet ta shqyrtojë deklaratën e tij. Rexhepi është dashur ta ngrejë këtë çështje në kryesi të partisë dhe jo në media. Në qoftë se nuk pajtohet me qëndrimin e Kryesisë mund të dilte publikisht”, ka thënë Haliti.
Sipas tij, deklaratat e tilla të ish-kryeministrit Rexhepi për SHIK-un, nuk vlerësohen pozitive as për partinë e as për të vetë.
“Ai me ata njerëz ka qenë bashkë”, ka thënë në fund Haliti.
