Policia të enjten ka zbuluar trupat e pesë foshnjave në një shtëpi në jugperëndim të Francës, ka bërë të ditur një burim i afërt me rastin, në atë që duket të jetë incidenti më i rëndë i vrasjes së fëmijëve në këtë vend, në pesë vitet e fundit.
Pasi trupi i një të porsalinduri u gjet në një qese termike më parë gjatë ditës, zyrtarët “zbuluan katër trupa të tjerë të foshnjave gjatë kërkimit të tyre” në një shtëpi në Louchats, pranë qytetit të Bordosë, ka thënë një burim, duke konfirmuar një raport të televizionit francez iTele.
Burimi ka shtuar se të katër kufomat tjera u gjetën në një frigorifer, transmeton Telegrafi.
“Babai 40-vjeçar është arrestuar ndërsa nëna 35-vjeçare u shtrua në spital”, ka shtuar burimi në fjalë, raportojnë mediet e huaja.
Më tej shtohet se ishte babai i cili fillimisht e gjeti një qese që përmbante kufomën e parë të një foshnje të porsalindur.
Nëna me sa duket “ka lindur në shtëpi vetëm”, tha burimi, duke shtuar se ajo ishte dërguar në një spital në Bordo “për ekzaminime gjinekologjike dhe psikiatrike”.
Sipas autoriteteve, gruaja “në këtë fazë nuk duket të ketë pasur një histori të sëmundjes mendore”.
“Autopsitë do të kryhen ndërkohë për të përcaktuar nëse foshnjat kanë lindur të gjalla”, thuhet më tej, transmeton Telegrafi.
Çifti ka dy vajza, një 13 dhe tjetra 15 vjeçare.
Rasti më i keq i vrasjes së fëmijëve në historinë e re franceze daton më 2010, kur një nënë kishte pranuar vrasjen e tetë foshnjave të saj, menjëherë pasi ato kanë lindur. /Telegrafi/
