Lideri i Aleancës për Ardhmërinë e Kosovës (AAK), Ramush Haradinaj duke vlerësuar 100 ditëshin e parë të Qeverisë “Mustafa” ka thënë se kjo periudhë mund përmblidhet shkurt me frazën “100 ditë mashtrim”. Kjo pasi sipas tij në 100 ditëshin e parë Qeveria e drejtuar nga Isa Mustafa nuk ka arritur të bëjë asnjë ndryshim pozitiv në qeverisjen e vendit. Këto deklarata kreu i AAK-së i ka dhënë në një konferencë për media.
“Çdo qytetarë i vendit tashmë e ka krijuar bindjen e vet, e dinë se cka ishte ky 100 ditësh, por fjala që i përshtatet më së shumti këtij 100 ditëshi është mashtrimi.
Pra nëse dojmë që me një fjalë ta shpjegojmë se çka ka ndodhë, çka i ka ndodhë qytetarit të vendit në këto 100 ditë është mashtrimi. Jemi mashtru me politika qeverisëse, jemi mashtru me obligimit që janë marrë nga institucionet e vendit, ka mashtrim ndaj qytetarit direkt, ka mashtrime të ndërsjella në politikë, mashtrime partnerë e akterë ndërkombëtar, pra thjeshtë jemi në një vorbull të mashtrimit nga Qeveria Mustafa- Thaçi”, është shprehur Haradinaj.
Ndryshe, AAK ka përmbledhur edhe 100 dështimet e Qeverisë së vendit në këtë periudhë.
